October 13, 2021
October 13, 2021
ദോഹ : കോവിഡ് വ്യാപനത്തിൽ കുറവ് വന്നതോടെ ഖത്തറിലെ ആരോഗ്യമേഖല പഴയ പ്രവർത്തന രീതിയിലേക്ക് മടങ്ങിയെത്തുന്നു. ആരോഗ്യകേന്ദ്രങ്ങളിൽ ഇനി മുതൽ നേരിട്ടുള്ള പരിശോധന നടത്താമെന്ന് ആരോഗ്യമന്ത്രാലയം വ്യക്തമാക്കി. നാലാം ഘട്ട ഇളവുകളുടെ ഭാഗമായാണ് ആശുപത്രികളിൽ എല്ലാ സേവനങ്ങളും പുനഃസ്ഥാപിച്ചതെന്ന് അധികൃതർ അറിയിച്ചു.
ആകെ 28 ആരോഗ്യകേന്ദ്രങ്ങളാണ് ഖത്തറിൽ ഉള്ളത്. ഇവയിൽ 27 കേന്ദ്രങ്ങളും പൂർവസ്ഥിതിയിലേക്ക് മടങ്ങി. റൗദത്ത് അൽ ഖൈൽ ഹെൽത്ത് സെന്റർ മാത്രമാണ് ഈ പട്ടികയിൽ ഉൾപ്പെടാത്തത്. കോവിഡ് ചികിത്സയ്ക്കുള്ള പ്രത്യേക ഇടമായി ഈ ആശുപത്രിയെ മാറ്റിയതാണ് കാരണം. രോഗികൾക്ക് ആശുപത്രിയിൽ നേരിട്ടെത്തി ചികിത്സ തേടാനുള്ള സാഹചര്യം ഉണ്ടെങ്കിലും, ഇതോടൊപ്പം തന്നെ ഓൺലൈൻ പരിശോധനയും തുടരും. ആശുപത്രിയിൽ എത്തുന്നവർ കോവിഡ് മാനദണ്ഡങ്ങൾ കൃത്യമായി പാലിക്കണമെന്നും, ആശുപത്രിയിലെ ജീവനക്കാർക്ക് കൃത്യമായ ഇടവേളകളിൽ കോവിഡ് ടെസ്റ്റ് നടത്തുമെന്നും അധികൃതർ അറിയിച്ചു.