October 10, 2021
October 10, 2021
ദോഹ: ഖത്തര് ആദ്യമായി വേദിയാവുന്ന ഫോര്മുല വണ് കാറോട്ട മത്സരത്തിന്റെ ടിക്കറ്റുകള് ചൊവ്വാഴ്ച മുതല് ലഭ്യമാകുമെന്ന് സംഘാടകര് അറിയിച്ചു.. നവംബര് 21നാണ് ഖത്തര് വേദിയാവുന്ന വേഗപ്പോരാട്ടം. ലുസൈല് സര്ക്യൂട്ടിലെ അതിവേഗട്രാക്കില് ക്വളിഫയറും പോള് പൊസിഷനിങ് റേസും ഉള്പ്പെടെ 19ന് തന്നെ ലോകത്തെ മുന്നിര ഡ്രൈവര്മാര് ട്രാക്കിലിറങ്ങും. പ്രകാശവേഗത്തില് കുതിക്കുന്ന കാറിെന്റ വളയം പിടിക്കുന്ന ലൂയിസ് ഹാമില്ട്ടനും വെര്സ്റ്റാപ്പനും സെബാസ്റ്റ്യന് വെറ്റലും ഉള്പ്പെടെയുള്ള എഫ്.വണ് ഡ്രൈവര്മാരുടെ സാഹസിക കുതിപ്പിന് നേരിട്ട് ദൃക്സാക്ഷ്യം വഹിക്കാനുള്ള അവസരമാണ് ഖത്തറിലെ എഫ്.വണ് പ്രേമികള്ക്ക് ലഭിച്ചിരിക്കുന്നത്. ലുസൈല് സര്ക്യൂട്ടിെന്റ ഔദ്യോഗിക വെബ്സൈറ്റ് വഴിയാണ് ടിക്കറ്റ് വില്പന (www.circuitlosail.com). 750 റിയാല് മുതലാണ് ടിക്കറ്റുകളുടെ നിരക്ക്.
വിവിധ സോണുകള് അനുസരിച്ച് 1000, 2000 റിയാലാണ് മറ്റു ടിക്കറ്റ് നിരക്കുകള്. രണ്ട് ഡോസ് വാക്സിന് സ്വീകരിച്ചവര്ക്ക് മാത്രമായിരിക്കും ഗാലറിയിലേക്ക് പ്രവേശനം. കോവിഡ് വ്യാപനം കാരണം സീസണിലെ വിവിധ ഗ്രാന്ഡ്പ്രീകള് മുടങ്ങിയതോടെയാണ് ഖത്തറിന് ആദ്യമായി എഫ്.വണ് വേദി ലഭിച്ചത്. നവംബറില് ആസ്ട്രേലിയയില് നടക്കേണ്ട റേസ് ഖത്തറിലേക്ക് മാറ്റുകയായിരുന്നു. ഇതിനു പുറമെ 2023 മുതല് 10 വര്ഷത്തേക്ക് എഫ്.വണ് വേദിസംബന്ധിച്ച കരാറിലും ഖത്തര് മോട്ടോര് റേസിങ് ഫെഡറേഷനും സംഘാടകരും ഒപ്പുവെച്ചിട്ടുണ്ട്. 2004 മുതല് മോട്ടോ ജി.പി, ടു വീലര് റേസുകളുടെ പ്രധാന വേദി കൂടിയാണ് ലുസൈല്.
ന്യൂസ്റൂം വാർത്തകൾ ലഭിക്കാൻ +974 66200167 എന്ന വാട്സ്ആപ് നമ്പറിൽ സന്ദേശം അയക്കുക.