October 28, 2021
October 28, 2021
ദോഹ: ലോകത്തിന്റെ സമാധാനത്തിനായി തന്റെ രാജ്യം നടത്തുന്ന നീക്കങ്ങളെ രാഷ്ട്രീയവൽക്കുന്ന പ്രവണത അവസാനിപ്പിക്കണമെന്ന് ഖത്തർ വിദേശകാര്യമന്ത്രി ഷെയ്ഖ് മുഹമ്മദ്‌ ബിൻ അബ്ദുൾ റഹ്മാൻ അൽ താനി. ആസ്ട്രേലിയൻ വിദേശകാര്യമന്ത്രിക്കൊപ്പം ദോഹയിൽ നടത്തിയ പത്രസമ്മേളനത്തിലാണ് മന്ത്രി ഈ പ്രസ്താവന നടത്തിയത്. അഫ്ഗാനിസ്താനെ ഒറ്റപ്പെടുത്തരുതെന്നും മന്ത്രി മറ്റ് രാജ്യങ്ങളോട് അഭ്യർത്ഥിച്ചു.
അന്താരാഷ്ട്രതലത്തിൽ ഖത്തറുമായി ആസ്‌ട്രേലിയ നടത്തുന്ന സഹകരണത്തിന് നന്ദി അറിയിച്ച മന്ത്രി, അഫ്ഗാനിസ്ഥാനിലെ പ്രതിസന്ധികൾ പരിഹരിക്കാൻ വേണ്ടിയാണ് താലിബാനുമായി ഖത്തർ സഹകരിക്കുന്നതെന്നും വ്യക്തമാക്കി. 'അഫ്ഗാൻ എന്ന രാജ്യത്തെയും, അവിടുത്തെ ജനങ്ങളെയും ഒറ്റപ്പെടുത്തുക എന്നതല്ല പരിഹാരം, അവർക്ക് സഹായഹസ്തം നീട്ടി, നിലവിലെ പ്രതിസന്ധിയിൽ നിന്നും കരകയറാൻ അവരെ സഹായിക്കണം'- മന്ത്രി അഭിപ്രായപ്പെട്ടു. ഫലസ്തീനുമേൽ അധികാരം സ്വന്തമാക്കാൻ ഇസ്രായേൽ നടത്തുന്ന ശ്രമങ്ങൾ ദൗർഭാഗ്യകരമാണെന്നും മന്ത്രി പ്രസ്താവിച്ചു. സമാധാനം ആണ് ലക്ഷ്യമെങ്കിൽ, ഫലസ്തീനിലേക്ക് ഇരച്ചുകയറുന്നതിന് പകരം ചർച്ചകൾ നടത്താൻ ഇസ്രായേൽ തയ്യാറാവണമെന്നും അൽ താനി അഭിപ്രായപ്പെട്ടു.
