December 10, 2021
December 10, 2021
ദോഹ : ഖത്തറിലെ ഏറ്റവും പ്രചാരമേറിയ ദീർഘദൂര മത്സര ഓട്ടമായ 'ഖത്തർ ഈസ്റ്റ് ടു വെസ്റ്റ് അൾട്രാ റൺ' ഇന്ന് അരങ്ങേറും. വിവിധ വിഭാഗങ്ങളിലായി 650 പേരാണ് ഇത്തവണ ടൂർണമെന്റിൽ പങ്കെടുക്കുന്നത്. 56 രാജ്യങ്ങളിൽ നിന്നായി മാറ്റുരയ്ക്കുന്ന മത്സരാർത്ഥികളിൽ 149 വനിതകളുമുണ്ട്. ഇന്ത്യയിൽ നിന്നും 21 ആളുകളാണ് ഈ മാരത്തോണിന്റെ ഭാഗമാവുന്നത്.
ഷെറാട്ടൺ പാർക്കിൽ നിന്നും ആരംഭിക്കുന്ന മത്സരം 90 കിലോമീറ്റർ അകലെ ദുഖാൻ ബീച്ചിലാണ് പര്യവസാനിക്കുക. ഇതിനിടെ അഞ്ചുസ്റ്റേഷനുകളിൽ മത്സരാർത്ഥികൾക്ക് വെള്ളത്തിനും ലഘുഭക്ഷണത്തിനും ഉളള സൗകര്യമൊരുക്കും. 225 പേർ പങ്കെടുക്കുന്ന ഖത്തർ കഴിഞ്ഞാൽ, 89 മത്സരാർത്ഥികൾ ഉളള ബ്രിട്ടനാണ് മത്സരത്തിൽ കൂടുതൽ പ്രാതിനിധ്യം ഉള്ളത്. പുലർച്ചെ 4:30 ന് ആരംഭിക്കുന്ന മത്സരം രാത്രി 8:30 വരെ നീണ്ടുനിൽക്കും. പ്രൊഫഷണൽ-അമച്വർ വ്യത്യാസമില്ലാതെ, മികച്ച ആരോഗ്യസ്ഥിതിയിലുള്ള ഏതൊരാൾക്കും മത്സരത്തിന്റെ ഭാഗമാവാം.