January 14, 2022
January 14, 2022
ദോഹ : കോവിഡിന്റെ ലക്ഷണങ്ങൾ പ്രകടിപ്പിക്കുന്ന വയോധികർക്ക് ബ്രുഫൻ (brufen) വേദനസംഹാരി നൽകുന്നത് ഉചിതമല്ലെന്ന് ഡോക്ടർ മുന അൽ മസ്ലമാനി. ഖത്തർ ടീവിയിലെ പരിപാടിക്കിടെയാണ് ഡോക്ടർ വേദനസംഹാരികളെ കുറിച്ച് പരാമർശിച്ചത്. വാർദ്ധക്യസഹജമായ അസുഖങ്ങളും, കിഡ്നി സംബന്ധ അസുഖങ്ങളും ഉള്ളവരിൽ ബ്രുഫൻ ഗുളികകൾ പാർശ്വഫലങ്ങൾ ഉണ്ടാക്കിയേക്കുമെന്ന മുന്നറിയിപ്പും ഡോക്ടർ നൽകി.
തലവേദന, പല്ല് വേദന, പേശീകളിലെ വേദന എന്നിവയ്ക്ക് ഖത്തറിൽ സാധാരണമായി ഉപയോഗിക്കുന്ന വേദനസംഹാരികളിൽ ഒന്നാണ് ബ്രുഫൻ. ഈ നിർദ്ദേശത്തിനൊപ്പം, ഒമിക്രോൺ കോവിഡും സാധാരണ കോവിഡും തമ്മിലുള്ള വ്യത്യാസങ്ങളും ഡോക്ടർ മസ്ലമാനി വിശദീകരിച്ചു. പനി, തലവേദന, ചുമ, ക്ഷീണം, പേശി വേദന എന്നിവ എല്ലാ തരം കോവിഡുകൾക്കും പൊതുവായി ഉളള ലക്ഷണങ്ങൾ ആണെന്നും, അസഹനീയമായ തൊണ്ട വേദന ഒമിക്രോണിന്റെ ലക്ഷണമാണെന്നും ഡോക്ടർ അറിയിച്ചു. സാധാരണ കോവിഡും ഡെൽറ്റ വകഭേദവും ശ്വാസകോശത്തെ ബാധിക്കുമ്പോൾ, ഒമിക്രോൺ ബാധിക്കുന്നത് തൊണ്ടക്കുഴലിനെയാണ്.
