January 02, 2022
January 02, 2022
ഫോട്ടോ : ഷാഹിർ അബുബക്കർ
ദോഹ : ഖത്തറിലെ അന്തരീക്ഷ താപനില ഇനിയും താഴ്‌ന്നേക്കുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. ഇന്ന് രാത്രി മുതൽ ഈ വാരാന്ത്യം വരെ വടക്കുപറഞ്ഞാറൻ ദിശയിൽ കാറ്റുവീശുമെന്നതിനാലാണ് താപനില താഴുന്നത്. ഇക്കാലയളവിലെ കുറഞ്ഞ താപനില 10-17 ഡിഗ്രി സെൽഷ്യസും കൂടിയ താപനില 18-24 ഡിഗ്രി സെൽഷ്യസുമായിരിക്കും. തണുപ്പ് കലശലായതോടെ പനിയും ജലദോഷവും അടക്കമുള്ള രോഗങ്ങളും രാജ്യത്ത് പടർന്നുപിടിക്കുകയാണ്.
താപനില പത്ത് ഡിഗ്രി സെൽഷ്യസിലും താഴാനും സാധ്യത ഉണ്ടെന്നാണ് കാലാവസ്ഥാ വിദഗ്ധരുടെ അഭിപ്രായം. കാറ്റിന്റെ ഭാഗമായി പൊടിക്കാറ്റ് ഉണ്ടായേക്കാമെന്നും, കാഴ്ചാപരിധി കുറഞ്ഞേക്കാമെന്നും അധികൃതർ പറഞ്ഞു. തിരമാലകൾ 10 അടി വരെ ഉയരാനും സാധ്യതയുണ്ട്. ഈ കാലയളവിൽ കടലിൽ പോവുന്നവർ അതീവജാഗ്രത പാലിക്കണമെന്നും നിർദ്ദേശമുണ്ട്.
