October 28, 2021
October 28, 2021
ദോഹ : ലെബനനിൽ നിന്നുള്ള പച്ചക്കറി ഇറക്കുമതി ഖത്തർ നിർത്തിവെച്ചു. അനുവദനീയമായതിലും അധികം അളവിൽ ഇ-കോളി ബാക്ടീരിയ ഉണ്ടെന്ന കാരണം ചൂണ്ടിക്കാട്ടിയാണ് ഇറക്കുമതി താൽകാലികമായി നിർത്തിവെച്ചത്. നവംബർ 7 മുതൽ പൊതിയിന, പാർസ്ലി, മല്ലി, തെയിം, മൊളോഖിയ എന്നീ പച്ചക്കറിയിനങ്ങൾ ലെബനനിൽ നിന്നും ഇറക്കുമതി ചെയ്യില്ലെന്ന് അധികൃതർ അറിയിച്ചു.
കഴിഞ്ഞമാസങ്ങളിൽ പരിശോധിച്ച സാമ്പിളുകൾ അപകടകരമായ അളവിൽ കീടനാശിനികളും, ഇ-കോളി ബാക്ടീരിയയും ഉണ്ടെന്ന് സ്ഥിരീകരിച്ചതിനാലാണ് ഈ നീക്കമെന്നാണ് അധികൃതരുടെ ഔദ്യോഗിക വിശദീകരണം. വിഷയത്തിൽ ഖത്തർ മന്ത്രാലയവുമായി ചർച്ച നടത്തിയിട്ടുണ്ടെന്നും, ആവശ്യമായ നടപടികൾ കൈക്കൊള്ളുമെന്നും ലെബനീസ് കാർഷികമന്ത്രി അബ്ബാസ് ഹജ്ജ് ഹസൻ ദോഹ ന്യൂസിനോട് പറഞ്ഞു. നിരോധനം സമീപഭാവിയിൽ തന്നെ നീക്കാൻ കഴിയുമെന്നാണ് പ്രതീക്ഷയെന്ന് അഭിപ്രായപ്പെട്ട മന്ത്രി, കയറ്റുമതി ചെയ്യുന്ന വസ്തുക്കളുടെ ഗുണമേന്മ ഉറപ്പുവരുത്തുമെന്നും അറിയിച്ചു. വീഴ്ച വരുത്തുന്ന കയറ്റുമതിക്കാർക്കെതിരെ പിഴ അടക്കമുള്ള ശിക്ഷാനടപടികൾ സ്വീകരിക്കാനുള്ള ഒരുക്കത്തിലാണ് ലബനൻ കാർഷികമന്ത്രാലയം.