February 25, 2022
February 25, 2022
ദോഹ : ഇന്ത്യയിൽ നിന്നും ഖത്തറിലെത്തുന്ന യാത്രികർക്കായി ഇന്ത്യൻ എംബസി പുതിയ മാർഗനിർദേശങ്ങൾ പുറപ്പെടുവിച്ചു. ഖത്തർ പൊതുജനാരോഗ്യമന്ത്രാലയം പുതിയ കോവിഡ് മാനദണ്ഡങ്ങൾ പുറത്തിറക്കിയതിന് പിന്നാലെയാണ് ഇന്ത്യൻ എംബസി മാർഗനിർദേശങ്ങൾ പ്രസിദ്ധീകരിച്ചത്. ഫെബ്രുവരി 28 തിങ്കളാഴ്ച, ഖത്തർ സമയം വൈകീട്ട് ഏഴ് മണി മുതലാണ് പുതിയ ഇളവുകൾ നിലവിൽ വരിക.
ഖത്തർ ആരോഗ്യമന്ത്രാലയത്തിന്റെ പുതിയ സർക്കുലർ പ്രകാരം ഇന്ത്യയടക്കമുള്ള ഒൻപത് രാജ്യങ്ങൾ 'റെഡ് ഹെൽത്ത്' കാറ്റഗറിയിലാണ് ഉൾപ്പെടുന്നത്. ഖത്തർ താമസവിസയുള്ളവർക്ക് ( വാക്സിനേഷൻ പൂർത്തിയാക്കുകയോ, കോവിഡിൽ നിന്ന് അടുത്തിടെ മുക്തി നേടിയവർ ) ഇനി യാത്രക്ക് മുൻപെടുത്ത ആർ.ടി. പി.സി. ആർ ഫലമോ, കൊറന്റൈനോ ആവശ്യമില്ലെന്ന് എംബസി വ്യക്തമാക്കി. ഖത്തറിലെത്തി 24 മണിക്കൂറിനകം ആന്റിജൻ പരിശോധന നടത്തണം. വാക്സിൻ എടുക്കാത്തവർ ഖത്തറിലേക്ക് യാത്ര തിരിക്കുന്നതിന്റെ 48 മണിക്കൂർ മുൻപെങ്കിലും എടുത്ത ആർ. ടി. പിസി. ആർ ഫലം ഹാജരാക്കണം. ഖത്തറിൽ എത്തിയാൽ അഞ്ചുദിവസത്തെ ഹോട്ടൽ കൊറന്റൈനും റാപിഡ് ആന്റിജൻ പരിശോധനയും നടത്തണം.
വാക്സിനേഷൻ പൂർത്തിയാക്കി സന്ദർശക വിസയിൽ വരുന്നവരും, കോവിഡിൽ നിന്ന് അടുത്തിടെ മുക്തി നേടിയവരും 48 മണിക്കൂർ മുൻപെടുത്ത ആർ.ടി.പി.സി.ആർ പരിശോധനാ ഫലം ഹാജരാക്കണം. ഇവർ ഒരു ദിവസം ഹോട്ടൽ കൊറന്റൈനിൽ കഴിയുകയും, ഖത്തറിലെത്തി 24 മണിക്കൂറിനകം റാപിഡ് ആന്റിജൻ പരിശോധന നടത്തുകയും വേണം. വാക്സിനേഷൻ പൂർത്തിയാക്കാതെ സന്ദർശകവിസയിൽ ഖത്തറിൽ പ്രവേശിക്കാൻ കഴിയില്ലെന്നും ഇന്ത്യൻ എംബസി ഓർമിപ്പിച്ചു.