September 15, 2019
September 15, 2019
ദോഹ : അറബ് മേഖലയിലെ രാഷ്ട്രീയ വിഷയങ്ങളുടെ അടിസ്ഥാനം ഫലസ്തീന് പ്രശ്നമാണെന്ന് ഖത്തര് വിദേശകാര്യ മന്ത്രിയും ഉപപ്രധാനമന്ത്രിയുമായ ശൈഖ് മുഹമ്മദ് ബിൻ അബ്ദുൽ റഹിമാൻ അൽതാനി പറഞ്ഞു.ഫലസ്തീൻ പ്രശ്നത്തിന് അന്തിമ പരിഹാരമാകാതെ മേഖലയിലെ പ്രശനങ്ങള് അവസാനിക്കില്ലെന്നും അദ്ദേഹം വ്യക്തമാക്കി.
അന്താരാഷ്ട്ര പ്രമേയങ്ങളുടെ അടിസ്ഥാനത്തില് ഫലസ്തീന് പ്രശ്നത്തിന് സുസ്ഥിരമായ പരിഹാരം ഉണ്ടാകണം. ഫലസ്തീന് ജനതയ്ക്കു നേരെയുള്ള ഇസ്രായേലിന്റെ തുടർച്ചയായ അധിനിവേശങ്ങൾ രാജ്യം തള്ളിക്കളയുകയാണ്. സമാനമായ അഭിപ്രായമുള്ള മറ്റ് അറബ് രാജ്യങ്ങളോടും നമ്മുടെ സഹോദരങ്ങള്ക്കൊപ്പം നില്ക്കാന് ആവശ്യപ്പെടുന്നതായും മുഹമ്മദ് ബിന് അബ്ദുല് റഹ്മാന് ആല്ഥാനി പറഞ്ഞു.
ഇസ്രായേലിൽ അടുത്തയാഴ്ച നടക്കുന്ന പൊതുതെരഞ്ഞെടുപ്പില് വിജയിച്ചാല് വെസ്റ്റ് ബാങ്കിന്റെ കൂടുതല് ഭാഗം ഇസ്രായേലുമായി കൂട്ടിച്ചേര്ക്കുമെന്ന് കഴിഞ്ഞ ദിവസമാണ് ബെഞ്ചമിന് നെതന്യാഹു പ്രഖ്യാപിച്ചത്.യു.എന്നും സൗദി ഉൾപെടെയുള്ള അറബ് രാജ്യങ്ങളും നെതന്യാഹുവിന്റെ പ്രസ്താവനയിൽ പ്രതിഷേധം അറിയിച്ചിരുന്നു.