September 17, 2019
September 17, 2019
ദോഹ: രാജ്യത്തെ ഫ്രീസോണുകളില് നിക്ഷേപം ശക്തിപ്പെടുത്താന് ഖത്തറും ചൈനയും തയാറെടുക്കുന്നു. ഇതിന്റെ ഭാഗമായി ചൈനീസ് പ്രതിനിധി സംഘം ഖത്തര് ഫ്രീസോണ്സ് അതോറിറ്റി(ഖ്യു.എഫ്.ഇസെഡ്.എ) ചെയര്മാൻ ശൈഖ് അഹ്മദ് ബിന് മുഹമ്മദ് അല്സായിദുമായി ചര്ച്ച നടത്തി.
ഷാങ്ഹായി പീപ്പിള്സ് കോണ്ഗ്രസ് ചെയര്പേഴ്സന് യിന് യികൂയിയുടെ നേതൃത്വത്തിലുള്ള സംഘമാണ് ഇരുരാഷ്ട്രങ്ങളും തമ്മിലുള്ള വ്യാപാര-വാണിജ്യബന്ധം ശക്തിപ്പെടുത്താനുള്ള ചര്ച്ചകള്ക്കായി ഖത്തറിലെത്തിയത്. അഹ്മദ് ബിന് മുഹമ്മദിന്റെ ഔദ്യോഗിക വസതിയില് നടന്ന കൂടിക്കാഴ്ചയില് ഫ്രീസോണ്, നിക്ഷേപ മേഖലകളില് വ്യാപാര-നിക്ഷേപബന്ധം ശക്തിപ്പെടുത്താന് ധാരണയായിട്ടുണ്ട്.
യിന് യികൂയിക്കു പുറമെ ഖത്തറിലെ ചൈനീസ് അംബാസഡര് സൂ ജിയാന്, ഷാങ്ഹായി മുനിസിപ്പല് പീപ്പിള്സ് കോണ്ഗ്രസ് സ്റ്റാന്ഡിങ് കമ്മിറ്റി സെക്രട്ടറി ജനറല് ചെന് ജിങ്, വിവിധ ചൈനീസ് കമ്പനികളുടെ മേധാവികള് എന്നിവരാണ് ഔദ്യോഗിക കൂടിക്കാഴ്ചയില് പങ്കെടുത്തത്. പ്രമുഖ ചൈനീസ്-ഖത്തര് നിക്ഷേപകര്, ഖത്തര് ഫീസോണുകള്, ഷാങ്ഹായി പൈലറ്റ് ഫ്രീ ട്രേഡ് സോൺ എന്നിവ തമ്മിൽ സഹകരണം മെച്ചപ്പെടുത്തുന്നതിനെ കുറിച്ചും നേതാക്കള് ചര്ച്ച ചെയ്തു.