March 12, 2022
March 12, 2022
ന്യൂ ഡൽഹി : ഗോകുൽപുരി പ്രദേശത്തെ ചേരിയിലുണ്ടായ തീപിടുത്തത്തിൽ ഏഴ് പേർ മരിക്കുകയും നിരവധി പേർക്ക് പരിക്കേൽക്കുകയും ചെയ്തതായി ഡൽഹി പോലീസ് സ്ഥിരീകരിച്ചത്. ഇന്ന് പുലർച്ചെയാണ് പ്രദേശത്ത് തീ പടർന്നത്. ഓലമേഞ്ഞ കുടിലുകളിൽ തീ പെട്ടെന്ന് തന്നെ പടർന്നുപിടിക്കുകയായിരുന്നു. സംഭവത്തിൽ അറുപതോളം കുടിലുകൾ കത്തിനശിച്ചു. ആളുകൾ ഉറങ്ങിക്കിടക്കുമ്പോഴാണ് തീ പടർന്നതെന്നും അതിനാലാണ് മരണങ്ങൾ റിപ്പോർട്ട് ചെയ്യപ്പെട്ടതെന്നും പോലീസ് കൂട്ടിച്ചേർത്തു.
പതിമൂന്നോളം ഫയർഫോഴ്സ് യൂണിറ്റുകൾ മൂന്ന് മണിക്കൂറുകളോളം പരിശ്രമിച്ചാണ് തീ നിയന്ത്രണവിധേയമാക്കിയത്. തീപിടുത്തത്തിന്റെ കാരണം ഇതുവരെ കണ്ടെത്താൻ കഴിഞ്ഞിട്ടില്ലെന്നും, ഫോറൻസിക് സംഘം സംഭവസ്ഥലത്ത് എത്തിയതായും അഗ്നിശമന സേനാ മേധാവി അതുൽ ഗാർഗ് അറിയിച്ചു. തിരിച്ചറിയാനാവാത്ത വിധത്തിൽ കത്തിക്കരിഞ്ഞ നിലയിലാണ് മൃതദേഹങ്ങൾ കണ്ടെത്തിയത്. സംഭവത്തിൽ ദുഃഖം രേഖപ്പെടുത്തിയ ഡൽഹി മുഖ്യമന്ത്രി അരവിന്ദ് കെജ്രിവാൾ, വൈകാതെ മരണപ്പെട്ടവരുടെ ബന്ധുക്കളെ സന്ദർശിക്കുമെന്ന് ട്വിറ്ററിലൂടെ അറിയിച്ചു.