November 27, 2021
November 27, 2021
ഖത്തർ മുൻ സാംസ്കാരിക മന്ത്രിയും നിലവിലെ സഹമന്ത്രിയുമായ ഡോ. ഹമദ് അൽ കുവാരിയുടെ വിഖ്യാത പുസ്തകത്തിന്റെ മലയാള വിവർത്തനം നവംബർ 28ന് ദോഹയിൽ പ്രകാശനം ചെയ്യും. ' അലാ ഖദ്രി അഹ്ലിൽ അസ്മ ' എന്ന പുസ്തകമാണ് മലയാളത്തിലേക്ക് മൊഴിമാറ്റി ഇറക്കുന്നത്. സി ഐ സി ഖത്തറിന്റെ ഗവേഷണ വിഭാഗമായ സി എസ് ആർ ഖത്തറും ഖത്താറയും സംയുക്തമായാണ് പ്രകാശന ചടങ്ങ് സംഘടിപ്പിക്കുന്നത്. ഐ പി എച്ച് ആണ് പുസ്തകത്തിന്റെ പ്രസാധകർ.
'ഒരു അറബ് നയതന്ത്രഞ്ജന്റെ സാംസ്കാരിക വിചാരങ്ങൾ' എന്ന ശീർഷകത്തിൽ പ്രമുഖ പരിഭാഷകനും എഴുത്തുകാരനും ഖത്തറിൽ പ്രവാസിയുമായ ഹുസൈൻ കടന്നമണ്ണയാണ് പുസ്തകം പരിഭാഷപ്പെടുത്തിയത്. നവംബർ 28ഞായറാഴ്ച ഖത്തർ സാംസ്കാരിക മന്ത്രാലയത്തിന് കീഴിലുള്ള ഖത്താറ പൈതൃകഗ്രാമത്തിൽ പുസ്തകം പ്രകാശനം ചെയ്യും. ഖത്തറിൽ നേരത്തെ വാർത്ത വിനിമയ മന്ത്രിയായും സംസ്കാരിക കലാ പൈതൃക വകുപ്പ് മന്ത്രിയായും വിവിധ രാജ്യങ്ങളിലെ സ്ഥാനപതിയായും യു. എൻ, യുനെസ്കോ പ്രതിനിധിയായും പ്രവർത്തിച്ച ഡോ. ഹമദ് ബിൻ അബ്ദുൽ അസീസ് അൽ കുവാരിയുടെ സാംസ്കാരിക മേഖലയിലെ അനുഭവങ്ങളെ മുൻനിർത്തിയാണ് പുസ്തകം എഴുത്തപ്പെട്ടത്. ഇതിനകം ഇംഗ്ലീഷ്,ഫ്രഞ്ച്, സ്പാനിഷ്, പേർഷ്യൻ എന്നീ ഭാഷകളിലേക്ക് വിവർത്തനം ചെയ്തിട്ടുണ്ട്. ദോഹയിൽ നടന്ന വാർത്ത സമ്മേളനത്തിൽ സി. ഐ. സി ഖത്തർ ജനറൽ സെക്രട്ടറി ആർ. എസ് അബ്ദുൽ ജലീൽ, വൈസ് പ്രസിഡന്റ് ടി. കെ ഖാസീം, മുൻ പ്രസിഡന്റും കൂടിയാലോചനാ സമിതി അംഗവുമായ കെ. സി അബ്ദുൽ ലത്തീഫ്, സി. എസ്. ആർ ദോഹ ഡയറക്ടർ അബ്ദുറഹ്മാൻ പുറക്കാട്, വിവർത്തകൻ ഹുസൈൻ കടന്നമണ്ണ എന്നിവരും പങ്കെടുത്തു.