September 25, 2021
September 25, 2021
ഇന്ത്യൻ പ്രീമിയർ ലീഗിൽ ഇന്ന് രണ്ട് മത്സരങ്ങൾ. ഇന്ത്യൻ സമയം 3.30 ന് നടക്കുന്ന ആദ്യമത്സരത്തിൽ ഡൽഹി ക്യാപിറ്റൽസും രാജസ്ഥാൻ റോയൽസും ഏറ്റുമുട്ടും. സൺറൈസേഴ്സ് ഹൈദരാബാദും പഞ്ചാബ് കിങ്സും തമ്മിൽ 7:30 നാണ് രണ്ടാം മത്സരം. ആദ്യമത്സരത്തിന് അബുദാബി വേദിയാവുമ്പോൾ, ഷാർജയിലാണ് പഞ്ചാബും ഹൈദരാബാദും കൊമ്പുകോർക്കുന്നത്.
പ്ലേ ഓഫ് ഘട്ടം ഏതാണ്ട് ഉറപ്പിക്കാനായതിന്റെ ആത്മവിശ്വാസവുമായി ഡൽഹി ഇറങ്ങുമ്പോൾ, രാജസ്ഥാന് ഇന്ന് ജീവന്മരണ പോരാട്ടമാണ്. നിലവിൽ അഞ്ചാമതുള്ള രാജസ്ഥാന് മികച്ച മാർജിനിൽ വിജയം സ്വന്തമാക്കാനായാൽ കൊൽക്കത്തയെ മറികടന്ന് ആദ്യനാലിൽ കടക്കാം. നോർക്യ-റബാഡ പേസ് നിരയും രാജസ്ഥാൻ ബാറ്റിംഗ് യൂണിറ്റും തമ്മിലുള്ള പോരാട്ടമാവും മത്സരഫലം നിർണ്ണയിക്കുക. പഞ്ചാബിനെതിരെ പിന്നിൽ നിന്നും പൊരുതിക്കയറിയ രാജസ്ഥാൻ ടീമിലെ യുവതാരങ്ങളുടെ പ്രകടനവും നിർണ്ണായകമാവും.
പോയിന്റ് പട്ടികയിലെ അവസാനസ്ഥാനക്കാരെന്ന നാണക്കേടും പേറിയാണ് ഹൈദരാബാദും പഞ്ചാബും ഏറ്റുമുട്ടാനെത്തുന്നത്. രാജസ്ഥാനോട് അവസാനഓവറിൽ അവിശ്വസനീയതോൽവി വഴങ്ങിയ പഞ്ചാബിന് പ്ലേ ഓഫിലെത്താൻ ഇപ്പോഴും നേരിയ പ്രതീക്ഷയുണ്ട്. അതേസമയം, അവസാനസ്ഥാനത്ത് നിന്നും പുറത്ത് കടക്കാനാവും ഹൈദരാബാദിന്റെ പരിശ്രമം. ബെയർസ്റ്റോയുടെ അഭാവത്തിൽ ബാറ്റിംഗ് നിര അമ്പേ പരാജയമാവുന്നതാണ് ഹൈദരാബാദിന്റെ പ്രധാന തലവേദന. ഡേവിഡ് വാർണർ മികച്ച തുടക്കം നൽകിയില്ലെങ്കിൽ മികച്ച സ്കോറിലേക്കെത്താൻ ടീം വിയർക്കുന്ന സാഹചര്യമാണ് നിലവിൽ. വിജയം മാത്രം ലക്ഷ്യം വെച്ച് ഇരുനിരയും കളത്തിലിറങ്ങുമ്പോൾ മത്സരം ആവേശം പകരുമെന്നുറപ്പ്.