February 16, 2022
February 16, 2022
ന്യൂ ഡൽഹി : ഇന്ത്യൻ ചലച്ചിത്രഗാനചരിത്രത്തിലെ എക്കാലത്തെയും വലിയ ഒരുപിടി ഹിറ്റുകൾ സമ്മാനിച്ച ബപ്പി ലാഹിരി അന്തരിച്ചു. നെഞ്ചിലെ അണുബാധയെ തുടർന്ന് മുബൈയിലെ ഹോസ്പിറ്റലിൽ ആയിരുന്നു അന്ത്യം. 69 വയസായിരുന്നു. അമിതാഭ് ബച്ചൻ, അജയ് ദേവ്ഗൺ, മിഥുൻ ചക്രവർത്തി തുടങ്ങിയ നായകന്മാർക്കായി നിരവധി ഗാനങ്ങളാലപിച്ച ബപ്പി സംഗീതസംവിധാനത്തിലും മികവ് പുലർത്തിയിരുന്നു.
1980-90 കാലഘട്ടത്തിൽ, ഡിസ്കോ സംഗീതത്തിന്റെ മായികലോകത്തേക്ക് ഇന്ത്യൻ സംഗീതാസ്വാദകരെ കൈപിടിച്ചുയർത്തിയ ബപ്പി, സ്വർണചെയിനുകൾ അണിഞ്ഞായിരുന്നു വേദികളിൽ പ്രത്യക്ഷപ്പെടാറ്. ചൽത്തേ ചൽത്തേ, ഡിസ്ക്കോ ഡാൻസർ, ശറാബി തുടങ്ങിയവയാണ് ചിട്ടപ്പെടുത്തിയ ഗാനങ്ങളിൽ ഏറ്റവും പ്രശസ്തം. ബപ്പിയുടെ നിര്യാണത്തിൽ പ്രധാനമന്ത്രി അടക്കമുള്ളവർ അനുശോചനം രേഖപ്പെടുത്തി. നിരവധി ബോളിബുഡ് താരങ്ങളും സമൂഹമാധ്യമങ്ങളിലൂടെ ബപ്പിയുടെ വിയോഗത്തിൽ അഗാധദുഃഖം രേഖപ്പെടുത്തി. കഴിഞ്ഞ വർഷം കോവിഡ് ബാധിച്ചതോടെയാണ് അദ്ദേഹത്തിന്റെ ആരോഗ്യനില വഷളായതെന്നും, ഒരുമാസത്തോളം ആശുപത്രിയിൽ ചിലവഴിച്ചതിന് ശേഷം തിങ്കളാഴ്ച്ച വീട്ടിലേക്ക് മടങ്ങുകയും, ചൊവ്വാഴ്ച്ച തന്നെ വീണ്ടും ആശുപത്രിയിൽ എത്തിച്ചതിന് ശേഷം, രാത്രിയോടെയാണ് മരണപ്പെട്ടതെന്നും ഇന്ത്യൻ പ്രസ്സ് ട്രസ്റ്റ് അറിയിച്ചു.