June 23, 2021
June 23, 2021
ദോഹ: ലോകത്തിലെ ഏറ്റവും വലിയ വാക്സിനേഷന് സെന്ററെന്നു കരുതുന്ന ഖത്തറിലെ കേന്ദ്രത്തില് 25,000 ഡോസും 27 ഹെല്ത്ത് സെന്ററുകളില് 15,000 ഡോസും ചേര്ത്ത് ദിവസം 40,000 ഡോസ് വാക്സിന് നല്കാന് ഖത്തറിന് സാധിക്കും. പി.എച്ച്.സി.സി മാനേജിങ് ഡയറക്ടര് ഡോ. മറിയം അബ്ദുല് മാലിക്കാണ് ഇക്കാര്യം അറിയിച്ചത്.
ബിസിനസ്, വ്യാവസായിക മേഖലയിലെ ജീവനക്കാര്ക്കു വേണ്ടിയുള്ള കൂറ്റന് വാക്സിനേഷന് കേന്ദ്രമാണ് ഖത്തറില് കഴിഞ്ഞ ദിവസം തുറന്നത്. പൊതുജനാരോഗ്യ മന്ത്രി ഹനാന് മുഹമ്മദ് അല് കുവാരി ചൊവ്വാഴ്ച്ച ഇന്ഡസ്ട്രിയല് ഏരിയയിലെ ഖത്തര് വാക്സിനേഷന് സെന്റര് സന്ദര്ശിച്ചിരുന്നു.
പൊതുജനാരോഗ്യ മന്ത്രാലയം, ഹമദ് മെഡിക്കല് കോര്പറേഷന്, പ്രൈമറി ഹെല്ത്ത്കെയര് കോര്പറേഷന്, ഖത്തര് ചാരിറ്റി എന്നിവ സഹകരിച്ചാണ് പുതിയ വാക്സിനേഷന് കേന്ദ്രം ഒരുക്കിയത്. ഖത്തര് ആഭ്യന്തര മന്ത്രാലയം, കൊണോകോഫിലിപ്സ് ഖത്തര് എന്നിവയുടെ സഹകരണവുമുണ്ട്. മൂന്ന് ലക്ഷം ചതുരശ്രമീറ്ററില് ഒരുക്കിയിരിക്കുന്ന ഖത്തര് വാക്സിനേഷന് സെന്ററില് 300ലേറെ വാക്സിനേഷന് സ്റ്റേഷനുകളും 700 ജീവനക്കാരുമുണ്ടാവും. മൂന്ന് ലക്ഷത്തിലേറെ തൊഴിലാളികള് ഖത്തറില് ഇതിനകം വാക്സിനെടുത്തിട്ടുണ്ട്. സ്ഥാപനങ്ങള്ക്ക് QVC@hamad.qa എന്ന ഇമെയില് വഴി തങ്ങളുടെ ജീവനക്കാര്ക്ക് വേണ്ടി വാക്സിന് ബുക്ക് ചെയ്യാം.