September 23, 2019
September 23, 2019
ദോഹ : ഖത്തറിൽ അവിദഗ്ധ തൊഴിലാളികള്ക്കുള്ള മിനിമം വേതനം സംബന്ധിച്ച പ്രഖ്യാപനം വര്ഷാവസാനത്തോടെ ഉണ്ടായേക്കുമെന്ന് റിപ്പോർട്ട്. ഇതിനുള്ള ശിപാര്ശകള് തൊഴില് മന്ത്രാലയത്തിന് സമര്പ്പിച്ചതായി നേരത്തേ ദോഹയിലെ അന്താരാഷ്ട്ര തൊഴില് സംഘടന (ഐ.എല്.ഒ) വ്യക്തമാക്കിയിരുന്നു. ഖത്തറിലേക്ക് ഏറ്റവും കൂടുതല് തൊഴിലാളികള് എത്തുന്ന ഇന്ത്യ, നേപ്പാള് എന്നിവിടങ്ങളിലെ അധികൃതരുമായി കൂടിയാലോചനകള് നടത്തിയ ശേഷമാണ് ശിപാര്ശകള് സമര്പ്പിച്ചത്.
സാമ്പത്തിക ഘടകങ്ങള് പരിഗണിച്ചാണ് മിനിമം വേതനത്തിന്റെ പരിധി ഉള്പ്പെടെയുള്ള ശിപാര്ശകള് മുന്നോട്ട് വെച്ചത്. ഐ.എല്.ഒയുടെ വ്യവസ്ഥകളും മാര്ഗനിര്ദേശങ്ങളും അനുസരിച്ചുള്ള നടപടികളായിരിക്കും ഉണ്ടാവുക. നിലവില് തൊഴിലാളികള്ക്ക് താല്ക്കാലിക മിനിമം വേതനമാണ് നല്കി വരുന്നത്. സ്ഥിര മിനിമം വേതനത്തില് താമസ, യാത്രാ ആനുകൂല്യങ്ങള് ഉള്പ്പെടില്ലെന്നാണ് വിവരം. തൊഴിലാളിയുടെ താമസം, യാത്ര, ജീവിത ചെലവുകള്, ഐഡി പുതുക്കല് എന്നിവയെല്ലാം തൊഴിലുടമ നിര്വഹിക്കേണ്ടി വരും. വിവേചനങ്ങളില്ലാതെ എല്ലാ രാജ്യങ്ങളില് നിന്നുള്ള തൊഴിലാളികള്ക്കും നിശ്ചിത മിനിമം വേതനം ഉറപ്പാക്കുന്നതാണ് പദ്ധതി.