March 04, 2022
March 04, 2022
ഡൽഹി : തന്റെ സമ്പാദ്യത്തിന്റെ വലിയൊരു ശതമാനവും ഡ്രൈവർക്കും മറ്റ് വീട്ടുജോലിക്കാർക്കുമായി പകുത്തുനൽകിയ ഐ.ഡി.എഫ്.സി ബാങ്ക് ചീഫ് എക്സിക്യൂട്ടീവ് ഓഫീസർ വി. വൈദ്യനാഥനെ അന്താരാഷ്ട്ര മാധ്യമങ്ങൾ പോലും വാഴ്ത്തുകയാണ്. ഏതാണ്ട് അഞ്ച് ലക്ഷത്തിലധികം ഡോളറോളം മൂല്യമുള്ള ഓഹരികളാണ് വൈദ്യനാഥൻ തന്റെ ജോലിക്കാർക്ക് സമ്മാനമായി നൽകിയത്. സ്വന്തമായി വീടില്ലാത്ത ജോലിക്കാർക്ക് വീടെന്ന സ്വപ്നം യാഥാർഥ്യമാക്കാൻ ഇതിലൂടെ കഴിയും.
2018 മുതലാണ് വൈദ്യനാഥൻ തന്റെ വരുമാനത്തിന്റെ ഒരു ഭാഗം ദാനം ചെയ്യാൻ ആരംഭിച്ചത്. 2020 ൽ തന്റെ പഴയ കണക്ക് ടീച്ചറിനും വൈദ്യനാഥൻ വലിയൊരു സംഖ്യ സമ്മാനമായി നൽകി. വിദ്യാർത്ഥിയായിരിക്കെ, സാമ്പത്തികമായി തളർന്ന നാളുകളിൽ ഈ ടീച്ചർ നൽകിയ അഞ്ഞൂറ് രൂപ തന്റെ ജീവിതം മാറ്റിമറിച്ചെന്ന് വൈദ്യനാഥൻ ഓർത്തെടുത്തു. കാരുണ്യപ്രവർത്തനങ്ങൾ നടത്തുന്ന ഒരു ട്രസ്റ്റിനും രണ്ട് ലക്ഷത്തോളം ഓഹരികൾ വൈദ്യനാഥൻ സമ്മാനമായി നൽകി. 2018 ഡിസംബർ 18 നാണ് മറ്റ് ബാങ്കുകളുമായി ലയിപ്പിച്ച്, ഐ.ഡി.എഫ്. സി ബാങ്ക് രൂപീകൃതമായത്. 2020 ൽ കോവിഡ് പ്രതിസന്ധി കാരണം അല്പമൊന്ന് കിതച്ചെങ്കിലും, ബാങ്ക് നിലവിൽ മികച്ച പ്രകടനമാണ് കാഴ്ച്ച വെക്കുന്നത്. ബാങ്കിന്റെ ഓഹരി വിലയിൽ അഞ്ച് ശതമാനത്തിന്റെ വർധനയും രേഖപ്പെടുത്തി. 2024 വരെ വൈദ്യനാഥൻ തന്നെയാണ് ബാങ്കിന്റെ ചീഫ് എക്സിക്യൂട്ടീവ് ഓഫീസറായി സേവനമനുഷ്ഠിക്കുക.