January 01, 2022
January 01, 2022
ദോഹ : ഖത്തറിൽ കോവിഡ് രോഗബാധ ഉള്ളവരുടെ എണ്ണം അനുദിനം വർധിക്കുന്ന സാഹചര്യത്തിൽ ഹമദ് ഹോസ്പിറ്റലിൽ കൂടുതൽ രോഗികളെ ഉൾക്കൊള്ളിക്കാൻ സൗകര്യം ഒരുക്കുമെന്ന് അധികൃതർ അറിയിച്ചു. ഔദ്യോഗിക ട്വിറ്റർ അക്കൗണ്ടിലൂടെ പുറത്തുവിട്ട വീഡിയോയിൽ തീവ്രപരിചരണ വിഭാഗത്തിന്റെ തലവനായ ഡോക്ടർ അഹമ്മദ് മുഹമ്മദാണ് ഇക്കാര്യം അറിയിച്ചത്. ഹമദിന് കീഴിലുള്ള പകർച്ചവ്യാധി ചികിത്സാസെന്റർ, ഹസം മെബൈറിക് ഹോസ്പിറ്റൽ, ഫീൽഡ് ഹോസ്പിറ്റൽ, ക്യൂബൻ ഹോസ്പിറ്റൽ എന്നിവിടങ്ങളിലാണ് നിലവിൽ കോവിഡ് രോഗികൾക്ക് ചികിത്സ നൽകുന്നത്. ആവശ്യമെങ്കിൽ കൂടുതൽ ആശുപത്രികളെ കോവിഡ് ചികിത്സയ്ക്ക് സജ്ജമാക്കുമെന്നാണ് ഡോക്ടർ അഹമ്മദ് അറിയിച്ചത്.
'കോവിഡ് രോഗികളുടെ എണ്ണം വർധിക്കുന്നു എന്ന യാഥാർഥ്യവുമായി നമ്മൾ പൊരുത്തപ്പെടേണ്ടതുണ്ട്. അതിന് ആനുപാതികമായി ആശുപത്രികളിലും കൂടുതൽ ഇടം വേണ്ടിവന്നേക്കാം. അത്തരമൊരു ഘട്ടം വന്നാൽ നേരിടാൻ ഹമദ് മെഡിക്കൽ കോർപറേഷൻ സജ്ജരാണ്'- ഡോക്ടർ കൂട്ടിച്ചേർത്തു. രാജ്യം നിലവിൽ നേരിടുന്നത് പുതിയൊരു കോവിഡ് തരംഗമാണെന്നും, മാസ്ക് അടക്കമുള്ള മുൻകരുതൽ നടപടികളിൽ വീഴ്ച വരുത്തരുതെന്നും ഡോക്ടർ ഓർമിപ്പിച്ചു.