September 26, 2019
September 26, 2019
ദോഹ: ഹമദ് മെഡിക്കല് കോര്പറേഷനും ഖത്തര് പോസ്റ്റും ചേര്ന്ന് മെഡിക്കല് ഡെലിവറി സര്വീസ് ആരംഭിക്കുന്നു. ഇതുമായി ബന്ധപ്പെട്ട് എച്ച്.എം.സിയും ഖത്തര് പോസ്റ്റും തമ്മില് ധാരണയായി.
എച്ച്.എം.സിയുടെ ഹോം ഹെല്ത്ത് കെയര് സര്വീസിനു കീഴില് ചികിത്സ തേടുന്ന 2,000ത്തോളം രോഗികള്ക്കാണു പുതിയ സംവിധാനം ഏറെ ഉപകാരപ്പെടുക. കയ്യുറകൾ, ബാന്ഡേജുകള്, മരുന്ന്, ഡ്രസിങ് സാമഗ്രികൾ,മറ്റ് രോഗപ്രതിരോധ സാമഗ്രികൾ എന്നിവ ഇനി മുതല് ഖത്തര് പോസ്റ്റ് വഴി വീട്ടുപടിക്കലെത്തും. ഇത്തരം വസ്തുക്കള്ക്കായി ഇനി രോഗികളോ അവരുടെ ബന്ധുക്കളോ എച്ച്.എം.സിയില് നേരിട്ടെത്തുന്നതിനെ കുറിച്ച് ആശങ്കപ്പെടേണ്ടതില്ലെന്നതാണ് പുതിയ സഹകരണത്തിന്റെ പ്രധാന പ്രയോജനമെന്ന് എച്ച്.എം.സി ക്വാളിറ്റി ഡെപ്യൂട്ടി ചീഫ് നാസര് അല്നഈമി പറഞ്ഞു.
രോഗികള്ക്കു ഗുണകരമാകുന്ന പുതിയ സംരംഭങ്ങളും മാറ്റങ്ങളും കൊണ്ടുവരാന് എച്ച്.എം.സി ശ്രമിച്ചുകൊണ്ടിരിക്കുകയാണെന്ന് നഈമി കൂട്ടിച്ചേര്ത്തു. നിരവധി പ്രീമിയം സര്വീസുകള് രോഗികള്ക്കു നേരിട്ട് വീട്ടുപടിക്കല് ലഭ്യമാക്കുന്ന തരത്തില് ഈ വര്ഷം ആദ്യത്തില് എച്ച്.എം.സിയും ഖത്തര് പോസ്റ്റും തമ്മിൽ കരാറില് ഒപ്പുവച്ചിരുന്നു.