March 30, 2022
March 30, 2022
ഡൽഹി : രാജ്യത്തെ പെട്രോൾ, ഡീസൽ വിലയിൽ വർധനവ് പ്രഖ്യാപിച്ചു. പെട്രോളിന് 88 പൈസയും, ഡീസലിന് 84 പൈസയുമാണ് വർധിച്ചത്. മാർച്ച് മാസത്തിന്റെ ആരംഭത്തിൽ ഏതാനും സംസ്ഥാനങ്ങളിലെ നിയമസഭാ തിരഞ്ഞെടുപ്പ് നടന്നതിനാൽ ഇന്ധനവിലയിൽ കാര്യമായ മാറ്റങ്ങൾ ഉണ്ടായിരുന്നില്ല. എന്നാൽ, ഇക്കഴിഞ്ഞ ഒൻപത് ദിവസങ്ങളിലായി എട്ട് തവണയാണ് ഇന്ധനത്തിന് വില വർധിപ്പിച്ചത്.
10 ദിവസത്തിനിടെ പെട്രോളിന് 6.11 രൂപയുടെ വർധനവാണ് രേഖപ്പെടുത്തിയത്. ഡീസലിന് ഇതേ കാലയളവിൽ 5.90 രൂപ കൂടി. മുഴുവൻ സംസ്ഥാനങ്ങളിലും വില വർധിപ്പിച്ചിട്ടുണ്ട്. ഡൽഹിയിൽ ഒരു ലിറ്റർ പെട്രോളിന് 101.01 ആയപ്പോൾ, കൊച്ചിയിൽ 110.41 പൈസ ആണ് വില. കേരളത്തിൽ പെട്രോളിന് പിന്നാലെ ഡീസലും വൈകാതെ സെഞ്ചുറിയടിക്കും. നിലവിൽ 99 രൂപയാണ് സംസ്ഥാനത്തെ ശരാശരി ഇന്ധനവില. റഷ്യ - യുക്രൈൻ സംഘർഷത്തെ തുടർന്ന് അന്താരാഷ്ട്ര എണ്ണ വിപണിയിൽ വിലക്കയറ്റം ഉണ്ടായതിനാൽ വരും നാളുകളിലും ഇന്ത്യയിൽ ഇന്ധന വില വർധിക്കുമെന്നാണ് സൂചനകൾ.