November 29, 2022
November 29, 2022
ന്യൂസ് ഏജൻസി
ദോഹ : ലോകകപ്പ് വേദികളിൽ പലപ്പോഴും അപമര്യാദയായി പെരുമാറി വാർത്തകളിൽ ഇടം പിടിക്കാറുള്ള ഇംഗ്ലീഷ് ഫുട്ബോൾ ആരാധകർ ഖത്തറിലെത്തിയപ്പോൾ മാര്യാദക്കാരായോ?അത്തരമൊരു സൂചനയാണ് ബ്രിട്ടീഷ് ഫുട്ബോളിംഗ് പൊലീസിന് ഖത്തറിൽ നേതൃത്വം നൽകുന്ന ചീഫ് കോൺസ്റ്റബിൾ മാർക് റോബെർട്സ് നൽകുന്നത്.ഖത്തർ ലോകകപ്പ് ഒരാഴ്ച പിന്നിട്ടപ്പോൾ ഒരു ഇംഗ്ലീഷ് ആരാധകനെതിരിൽ പോലും നടപടിയെടുക്കേണ്ടി വന്നിട്ടില്ലെന്ന് അദ്ദേഹം പറയുന്നു.
ലോകകപ്പ് സ്റ്റേഡിയങ്ങളിൽ മദ്യം ലഭ്യമാക്കാതിരുന്ന ഖത്തറിന്റെ നടപടിയെ പ്രശംസിച്ച അദ്ദേഹം ബ്രിട്ടീഷ് ഫുട്ബോൾ മൈതാനങ്ങളിൽ മദ്യത്തിനുള്ള നിയന്ത്രണങ്ങളിൽ അയവ് വരുത്താനുള്ള തീരുമാനത്തെ പ്രതിരോധിക്കണമെന്നും മന്ത്രിമാരോട് ആവശ്യപ്പെട്ടു.
ഈ വർഷം ആദ്യം നടന്ന വനിതാ യൂറോകപ്പിൽ കണ്ട "ആവേശകരവും എന്നാൽ സൗഹൃദപരവുമായ" അന്തരീക്ഷമാണ് ഖത്തർ ലോകകപ്പിലും അനുഭവപ്പെട്ടതെന്നും അദ്ദേഹം കൂട്ടിച്ചേർത്തു.
ടൂർണമെന്റിന്റെ ആദ്യ ഒമ്പത് ദിവസങ്ങളിൽ അറസ്റ്റുകളോ അനിഷ്ട സംഭവങ്ങളോ റിപ്പോർട്ട് ചെയ്തിട്ടില്ലെന്ന് ചൂണ്ടിക്കാട്ടിയ അദ്ദേഹം ഇംഗ്ലണ്ടിന്റെയും വെയിൽസിന്റെയും ആരാധകരുടെ "മാതൃകാപരമായ" പെരുമാറ്റത്തിന് പ്രശംസിക്കുകയും ചെയ്തു.
അഹ്മദ് ബിൻ അലി സ്റ്റേഡിയത്തിൽ ചൊവ്വാഴ്ച ഇംഗ്ലണ്ടും വെയിൽസും തമ്മിൽ നടക്കുന്ന 'ബ്രിട്ടീഷ് യുദ്ധം' എന്നറിയപ്പെടുന്ന അവസാന ഗ്രൂപ്പ് ബി മത്സരത്തിലും ആരാധകർ ഇതേ അച്ചടക്കം പാലിക്കുമെന്ന് പ്രതീക്ഷിക്കുന്നതായും റോബർട്ട്സ് കൂട്ടിച്ചേർത്തു.
ന്യൂസ്റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/C2rupFykVgXBqmlpJc6amX എന്ന ലിങ്കിൽ ജോയിൻ ചെയ്യുക