February 18, 2022
February 18, 2022
ദോഹ : ലോകടെന്നീസിലെ ഗ്ലാമർ താരങ്ങൾ ഏറ്റുമുട്ടുന്ന 'ഖത്തർ ടോട്ടൽ എനർജി ഓപ്പൺ 2022' ന്റെ ടിക്കറ്റുകൾ സൗജന്യമായി സ്വന്തമാക്കാൻ അവസരം. ദോഹ മെട്രോ, ലുസൈൽ ട്രാം ഖത്തർ ടെന്നീസ് ഫെഡറേഷൻ എന്നിവ സംയുക്തമായാണ് സൗജന്യ ടിക്കറ്റുകൾ നൽകുന്നത്. ഫെബ്രുവരി 20 മുതൽ 23 വരെയാണ് ഈ അവസരം.
കോർണിഷ് മെട്രോ സ്റ്റേഷനിലെ ഗോൾഡ് ക്ലബ് ഓഫീസിൽ എത്തുന്നവർക്കാണ് ടിക്കറ്റുകൾ ലഭിക്കുക. ട്രാവൽ കാർഡ് കയ്യിൽ കരുതണം. ആദ്യമെത്തുന്ന 200 പേർക്കാണ് ഒരു ദിവസം ടിക്കറ്റ് ലഭിക്കുക. രാവിലെ ആറ് മണി മുതലാണ് ഗോൾഡ് ക്ലബ് ഓഫീസിൽ ടിക്കറ്റുകൾ നൽകിത്തുടങ്ങുക. ഒരാൾക്ക് ഒരു ടിക്കറ്റ് മാത്രമേ സൗജന്യമായി ലഭിക്കൂ എന്നും ദോഹ മെട്രോയും ലുസൈൽ ട്രാമും ട്വിറ്ററിലൂടെ അറിയിച്ചു. ഖലീഫ ഇന്റർനാഷണൽ ടെന്നീസ് കോംപ്ലക്സിൽ അരങ്ങേറുന്ന ടൂർണമെന്റ് വീക്ഷിക്കാൻ മെട്രോ ഉപയോഗിക്കാനും അധികൃതർ നിർദേശിച്ചു.