November 02, 2021
November 02, 2021
ദോഹ : ആധുനികചികിത്സാ രീതികളിലൊന്നായ റോബോട്ടിക് ശസ്ത്രക്രിയ ഹമദ് മെഡിക്കൽ കോർപറേഷനിൽ വിജയകരമായി പൂർത്തിയാക്കി. മധ്യവയസ്കയായ സ്ത്രീയുടെ പാൻക്രിയാസിലാണ് റോബോട്ടിക് ശസ്ത്രക്രിയ നടത്തിയത്. ശസ്ത്രക്രിയ പരിപൂർണവിജയമായിരുന്നുവെന്നും, രോഗി സുഖംപ്രാപിക്കുകയാണെന്നും അധികൃതർ അറിയിച്ചു.
കടുത്ത വേദനയുമായി ആശുപത്രിയിൽ എത്തിയ രോഗിയെ സ്കാൻ ചെയ്തപ്പോൾ പാൻക്രിയാസിൽ മുഴ ഉണ്ടെന്ന് കണ്ടെത്തുകയായിരുന്നു. 'ഡാവിഞ്ചി 11' എന്ന റോബോട്ടിക്ക് ഉപകരണം ഉപയോഗിച്ച് സാധാരണ ശസ്ത്രക്രിയയ്ക്ക് എടുക്കുന്നതിലും കുറഞ്ഞ സമയം കൊണ്ട് മുഴ നീക്കം ചെയ്യാൻ കഴിഞ്ഞെന്ന് ഡോക്ടർമാർ അറിയിച്ചു. ഡോക്ടർ അഹമ്മദ് എലഫാണ്ടിയാണ് ശസ്ത്രക്രിയയുടെ മേൽനോട്ടം വഹിച്ചത്. അധികം രക്തം നഷ്ടപ്പെടുത്താതെ ശസ്ത്രക്രിയ നടത്താൻ കഴിഞ്ഞെന്നും രോഗിയെ വീട്ടിലേക്ക് മാറ്റിയെന്നും ഡോക്ടർ അറിയിച്ചു.