September 24, 2021
September 24, 2021
വടക്കൻ ഡൽഹിയിലെ രോഹിണി കോടതിയിൽ ഗുണ്ടാസംഘങ്ങൾ തമ്മിലേറ്റുമുട്ടി. തുടർന്ന് നടന്ന വെടിവെപ്പിൽ കുപ്രസിദ്ധ ഗുണ്ടാ തലവൻ ജിതേന്ദ്ര ഗോഗി അടക്കം മൂന്ന് പേർ കൊല്ലപ്പെട്ടു. അക്രമികൾ അഭിഭാഷകരുടെ വേഷമണിഞ്ഞാണ് കോടതിയിൽ കടന്നത്. ഒരു കേസിൽ റിമാൻഡിൽ കഴിഞ്ഞിരുന്ന ഗോഗിയെ കോടതിയിൽ ഹാജരാക്കുന്നതിനിടെ ഇരച്ചുകയറിയ സംഘം വെടിയുതിർക്കുകയായിരുന്നു. ആക്രമണത്തിൽ നിരവധി പേർക്ക് പരിക്കേറ്റു.
പോലീസിന്റെ പ്രത്യാക്രമണവെടിവെപ്പിലാണ് അക്രമികളിൽ രണ്ട് പേർ കൊല്ലപ്പെട്ടത്. ഗോഗിയുടെ സംഘവുമായി ശത്രുതയുള്ള ടില്ലു ഗുണ്ടാസംഘം ഇയാളെ വകവരുത്താൻ കോടതിയിൽ നുഴഞ്ഞുകയറുകയായിരുന്നു. ഇരുസംഘങ്ങൾക്കും ഇടയ്ക്കിടെ അരങ്ങേറാറുള്ള രക്തച്ചൊരിച്ചിലുകളിൽ ഇതുവരെ ഇരുപത്തഞ്ചോളം പേർ കൊല്ലപ്പെട്ടിട്ടുണ്ടെന്ന് ഡൽഹി പോലീസ് വൃത്തങ്ങൾ അറിയിച്ചു.
