March 31, 2022
March 31, 2022
ദോഹ : ഓൺലൈൻ ഫുഡ് ഡെലിവറി പ്ലാറ്റ്ഫോമുകളിൽ അമിതവില പ്രദർശിപ്പിച്ച റെസ്റ്റോറന്റിനെതിരെ നടപടി. ഖത്തറിൽ പ്രമുഖ റെസ്റ്റോറന്റുകളിൽ ഒന്നായ 'അഫ്ഗാൻ ബ്രദേഴ്സി'ന്റെ ഒൻപത് ശാഖകൾ രണ്ടാഴ്ച്ച കാലയളവിലേക്ക് അടച്ചിടാൻ വ്യവസായ മന്ത്രാലയം ഉത്തരവിറക്കി. ഔദ്യോഗിക ട്വിറ്റർ അകൗണ്ടിലൂടെ മന്ത്രാലയം തന്നെയാണ് നടപടിയുടെ വിവരങ്ങൾ പുറത്തുവിട്ടത്.
റെസ്റ്റോറന്റിന്റെ മെനുവിൽ നൽകിയ വിലയേക്കാൾ അധികമാണ് ഓൺലൈൻ പ്ലാറ്റ്ഫോമുകളിൽ രേഖപ്പെടുത്തിയത്. ഇതുവഴി, ഉപഭോക്താക്കൾക്ക് അവർക്കിഷ്ടമുള്ള ഭക്ഷണം വാങ്ങുന്നതിൽ തടസ്സം നേരിട്ടതായി മന്ത്രാലയം വിലയിരുത്തി. ബർവ വില്ലേജ്, അൽ വക്ര, അൽ അസീസിയ, അൽ റയ്യാൻ, അൽ നസർ, ബിൻ ഒമ്രാൻ, എയർപോർട്ട് സ്ട്രീറ്റ്, ഉമ്മുസലാൽ മുഹമ്മദ്, അൽ മിർഖബ് എന്നീ ശാഖകളാണ് നടപടി നേരിട്ടത്. മാനദണ്ഡങ്ങൾ പാലിച്ചാൽ, രണ്ടാഴ്ച്ചക്ക് ശേഷം ഇവയ്ക്ക് തുറന്ന് പ്രവർത്തിക്കാം.