September 21, 2021
September 21, 2021
ദോഹ : കോവിഡ് മഹാമാരിയെ തുടർന്ന് കടുത്ത സാമ്പത്തിക പ്രതിസന്ധിലായ പ്രവാസികൾക്ക് ഇരുട്ടടിയായി ഫെയ്‌സ്ബുക്കിൽ തട്ടിപ്പ് സംഘങ്ങൾ സജീവമാകുന്നു.ഫെയ്‌സ്ബുക്കിലൂടെ സൗഹൃദം സ്ഥാപിച്ചശേഷം അവരുടെ പേരിൽ ഫെയ്ക് ഐഡിയുണ്ടാക്കി സുഹൃത്തുക്കൾക്ക് സൗഹൃദത്തിനായി റിക്വസ്റ്റ് അയക്കുകയും പിന്നീട് മെസഞ്ചർ വഴി സഹായത്തിനായി പണം ആവശ്യപ്പെടുന്നതുമാണ് പുതിയ തട്ടിപ്പു രീതി.ഗൾഫിൽ ജോലി ചെയ്യുന്ന നിരവധി പേർക്കാണ് അടുത്തകാലത്ത് ഇത്തരത്തിൽ പണം നഷ്ടമായത്.
ഖത്തറിൽ ഉൾപ്പെടെയുള്ള നിരവധി മലയാളികൾക്ക് ഇത്തരത്തിൽ പണം നഷ്ടപ്പെട്ടെങ്കിലും പലരും നാണക്കേട് കാരണം പുറത്തുപറയാറില്ല. സൗദിയുടെ കിഴക്കൻ പ്രവിശ്യയിലെ പ്രമുഖ മെഡിക്കൽ സ്ഥാപനങ്ങളിലെ നിരവധി ഡോക്ടർമാരുടെ പേരിൽ വ്യാജ ഐഡികൾ ഉണ്ടാക്കി അവരുടെ സുഹൃത്തുക്കളുമായി സൗഹൃദം സ്ഥാപിച്ച ശേഷം ചാറ്റ് ചെയ്ത് പണം ആവശ്യപ്പെട്ട സംഭവം റിപ്പോർട്ട് ചെയ്തിട്ടുണ്ട്.നാട്ടിൽ അവധിക്ക് എത്തിയതാണെന്നും പെട്ടെന്ന് അൽപം പണം ആവശ്യമായി വന്നുവെന്നും ഇന്നുതന്നെ പണം ഓൺലൈനായി അയച്ചു സഹായിക്കണമെന്നുമായിരുന്നു ആവശ്യം.ചില സുഹൃത്തുക്കളുടെ സഹായത്താൽ ഡോക്ടർക്ക് പണം നഷ്ടമായില്ലെങ്കിലും ഇത്തരത്തിൽ ഒരു ലക്ഷം രൂപ നഷ്ടമായ ആലപ്പുഴ സ്വദേശിയും സൗദിയിൽ ഉണ്ട്.ഗൾഫിലെ നിരവധി സാമൂഹ്യപ്രവർത്തകരുടെ പേരിലും ഇത്തരം തട്ടിപ്പുകൾ നടക്കുന്നുണ്ട്.യു.എ. യിലെ പ്രമുഖ സാമൂഹ്യപ്രവർത്തകൻ അഷ്‌റഫ് താമരശ്ശേരിയുടെ ഫെയ്സ്ബുക് പേജ് ഹാക്ക് ചെയ്യപ്പെട്ടതായി അദ്ദേഹം തന്നെ ഈയിടെ അറിയിച്ചിരുന്നു.
