November 28, 2021
November 28, 2021
ദോഹ : നവംബർ 30 ന് ആരംഭിക്കുന്ന ഫിഫ അറബ് കപ്പിന് വേണ്ട ഗതാഗത മുന്നൊരുക്കങ്ങൾ പൂർത്തിയായതായി ദോഹ മെട്രോ അറിയിച്ചു. നവംബർ 30 മുതൽ ഡിസംബർ 18 വരെ മെട്രോയുടെ പ്രവർത്തിസമയം വർധിപ്പിച്ചതായും അധികൃതർ അറിയിച്ചു. ശനി മുതൽ വ്യാഴം വരെ രാവിലെ ആറ് മുതൽ പുലർച്ചെ മൂന്ന് മണിവരെയും, വെള്ളിയാഴ്ചകളിൽ രാവിലെ 9 മുതൽ പുലർച്ചെ മൂന്ന് മണിവരെയും മെട്രോ പ്രവർത്തിക്കും. 110 ട്രെയിനുകളുമായാണ് ദോഹ മെട്രോ അറബ് കപ്പിനായി തയ്യാറെടുക്കുന്നത്.
ദോഹ മെട്രോയുടെ ചരിത്രത്തിലാദ്യമായി റെഡ് ലൈനിൽ ആറ് ട്രെയിനുകൾ ഒരേ സമയം സർവീസ് നടത്തുമെന്നും മെട്രോ അധികൃതർ കൂട്ടിച്ചേർത്തു. അറബ് കപ്പിന്റെ മൂന്ന് വേദികൾ മെട്രോയിൽ നിന്നും നടന്നെത്താവുന്ന ദൂരത്തിലായതിനാൽ ടൂർണമെന്റ് ആരംഭിച്ചാൽ മെട്രോകളിൽ നല്ല തിരക്ക് അനുഭവപ്പെടുമെന്നാണ് കണക്കുകൂട്ടൽ. സ്റ്റേഡിയം 974, എഡ്യൂക്കേഷണൽ സിറ്റി സ്റ്റേഡിയം, അഹ്മദ് ബിൻ അലി സ്റ്റേഡിയം എന്നിവയാണ് മെട്രോ സ്റ്റേഷനുകളുടെ അരികിലായി സ്ഥിതിചെയ്യുന്ന സ്റ്റേഡിയങ്ങൾ. മത്സരങ്ങളുടെ ഫാൻ ഐഡി കൈവശമുള്ളവർക്ക് മെട്രോയിൽ യാത്ര ചെയ്യാൻ കഴിയും.