October 31, 2019
October 31, 2019
ദോഹ : ദോഹയിലെ പ്രമുഖ വിദ്യാഭ്യാസ സ്ഥാപനമായ ദോഹ മോഡേൺ ഇന്ത്യൻ സ്‌കൂൾ ഈ അധ്യയന വർഷത്തോടെ പ്രവർത്തനം അവസാനിപ്പിക്കുന്നതായി രക്ഷിതാക്കൾക്ക് വാട്സ് ആപ് സന്ദേശം ലഭിച്ചു.ഇന്നലെ ഉച്ചയോടെയാണ് സ്‌കൂളിൽ പഠിക്കുന്ന രക്ഷിതാക്കളുടെ മൊബൈൽ ഫോണിലേക്ക് ഇതുസംബന്ധിച്ച സന്ദേശം ലഭിച്ചത്.ഒഴിവാക്കാനാകാത്ത കാരണങ്ങളാൽ 2019 - 2020 അധ്യയന വർഷത്തോടെ സ്‌കൂളിന്റെ പ്രവർത്തനം അവസാനിപ്പിക്കുകയാണെന്നും അടുത്ത അധ്യയന വർഷത്തേക്ക് വിദ്യാർത്ഥികൾക്ക് മറ്റു സ്‌കൂളുകളിൽ സീറ്റ് ഉറപ്പുവരുത്തണമെന്നുമാണ് അറിയിപ്പിലുള്ളത്. ഇതുമായി ബന്ധപ്പെട്ട കൂടുതൽ വിവരങ്ങളും മറ്റെന്തെങ്കിലും പുരോഗതിയുണ്ടെങ്കിൽ അടുത്ത ദിവസങ്ങൾക്കുള്ളിൽ അറിയിക്കാമെന്നും വാട്സ് ആപ്പ് . അതേസമയം,ഇത് സംബന്ധിച്ച ഔദ്യോഗിക സർക്കുലറോ മറ്റെന്തെങ്കിലും വിവരങ്ങളോ രക്ഷിതാക്കൾക്ക് ലഭിച്ചിട്ടില്ല.അതുകൊണ്ടു തന്നെ വാട്സ്ആപ്പ് സന്ദേശം സത്യമാണോ എന്നറിയാൻ കഴിയാതെ രക്ഷിതാക്കളിൽ പലരും ആശങ്കയിലായി.വിവരമറിയാൻ സ്‌കൂളുമായി ബന്ധപ്പെടാൻ ശ്രമിച്ചെങ്കിലും കൃത്യമായ മറുപടി ലഭിച്ചില്ലെന്ന് ചില രക്ഷിതാക്കൾ 'ന്യൂസ്റൂമി' നോട് പറഞ്ഞു.
നിലവിലെ സാഹചര്യത്തിൽ മിക്ക സ്‌കൂളുകളിലും പത്ത്,പന്ത്രണ്ട് ക്ളാസുകളിൽ പുതുതായി പ്രവേശനം ലഭിക്കാൻ എളുപ്പമല്ല.അതുകൊണ്ടു തന്നെ ഈ അധ്യയന വർഷം ഒൻപത്,പതിനൊന്ന് ക്ലാസുകളിൽ പഠനം പൂർത്തിയാക്കുന്ന കുട്ടികളുടെ ഭാവി പഠനം പ്രതിസന്ധിയിലാകുമോ എന്ന ആശങ്കയിലാണ് രക്ഷിതാക്കൾ.താലിബ് ഗ്രൂപ്പിന്റെ ഉടമസ്ഥതയിലുള്ള സ്‌കൂളിൽ രണ്ടായിരത്തോളം വിദ്യാർഥികൾ പഠിക്കുന്നുണ്ട്.ഇന്ത്യൻ സി.ബി.എസ്.സി കരിക്കുലം പിന്തുടരുന്ന സ്‌കൂളിൽ കെ.ജി-1 മുതൽ പന്ത്രണ്ടാം ക്ലാസ് വരെയാണുള്ളത്.2005 ലാണ് സ്‌കൂൾ പ്രവർത്തനം തുടങ്ങിയത്.
സ്‌കൂൾ പൂട്ടാനുള്ള തീരുമാനത്തിന് പിന്നിലെ യഥാർത്ഥ കാരണം അറിവായിട്ടില്ല.സ്‌കൂൾ മാനേജ്‌മെന്റുമായി ബന്ധപ്പെട്ട് ഇതുസംബന്ധിച്ച വിശദീകരണം തേടിയെങ്കിലും ആരും പ്രതികരിക്കാൻ തയാറായില്ല. ഫീസ് വർധിപ്പിക്കാൻ മാനേജ്‌മെന്റ് മന്ത്രാലയത്തിൽ അപേക്ഷിച്ചിരുന്നെങ്കിലും അനുമതി നിഷേധിച്ചിരുന്നതായാണ് അനൗദ്യോഗിക വിവരം. സാമ്പത്തിക കാരണങ്ങളാവാം ഇത്തരമൊരു തീരുമാനത്തിന് പിന്നിലെന്നാണ് സൂചന.സ്‌കൂൾ അടക്കുന്ന വിവരം ശ്രദ്ധയിൽ പെട്ടിട്ടുണ്ടെന്നും കൂടുതൽ വിവരങ്ങൾക്കായി കാത്തിരിക്കുകയാണെന്നുമാണ് ഇന്ത്യൻ എംബസി വൃത്തങ്ങൾ അറിയിച്ചത്.
