October 02, 2022
October 02, 2022
അൻവർ പാലേരി
ദോഹ : ലോകകപ്പിനോടനുബന്ധിച്ച് 3-2-1 ഖത്തർ ഒളിമ്പിക് ആൻഡ് സ്പോർട്സ് മ്യൂസിയത്തിൽ (ക്യുഒഎസ്‌എം)നടക്കുന്ന 'വേൾഡ് ഓഫ് ഫുട്ബോൾ' പ്രദർശനം സാംസ്കാരിക മന്ത്രി ശൈഖ് അബ്ദുൽറഹ്മാൻ ബിൻ ഹമദ് അൽതാനി ശനിയാഴ്ച ഉദ്ഘാടനം ചെയ്തു.
ഫുട്‌ബോളിന്റെ ഉത്ഭവം മുതൽ ഫിഫ ലോകകപ്പിന്റെ തുടക്കം വരെയുള്ള ചരിത്രത്തിലൂടെ സന്ദർശകരെ വഴിനടത്തുന്ന പ്രദർശനം ലോകജനതയെ ഒരുമിച്ചു നിർത്തുന്നതിൽ ഫുട്‍ബോളിനുള്ള പ്രാധാന്യം വരച്ചുകാണിക്കും.ഫുട്ബോൾ ആരാധകർക്ക് മാത്രമല്ല, എല്ലാ പ്രായത്തിലും സാംസ്കാരിക പശ്ചാത്തലത്തിലുമുള്ള മുഴുവൻ സന്ദർശകർക്കും പ്രദർശനം വേറിട്ട അനുഭവമായിരിക്കുമെന്ന് 3-2-1 ഖത്തർ ഒളിമ്പിക് ആൻഡ് സ്പോർട്സ് മ്യൂസിയം പ്രസിഡന്റ് ഷെയ്ഖ് മുഹമ്മദ് ബിൻ അബ്ദുല്ല അൽതാനി അഭിപ്രായപ്പെട്ടു.ജനങ്ങളെ പരസ്പരം അടുപ്പിക്കുകയും അവർക്കിടയിൽ ആശയവിനിമയത്തിന്റെ സാധ്യതയൊരുക്കുകയും ചെയ്യുന്നതിൽ കായികമേഖലക്കുള്ള പ്രാധാന്യവും പ്രദർശനം വിളംബരം ചെയ്യുമെന്നും അദ്ദേഹം കൂട്ടിച്ചേർത്തു.
'ഫുട്ബോൾ ഫോർ ആൾ;ആൾ ഫോർ ഫുടബോൾ, 'ദ റോഡ് ടു ദോഹ'; 'ഹിസ്റ്ററി ഇൻ ദ മേക്കിംഗ്'എന്നെ മൂന്നു വിഭാഗങ്ങളായാണ് പ്രദർശനം ഒരുക്കിയിട്ടുള്ളത്.ലോകകപ്പ് ചരിത്രത്തിന്റെ ഭാഗമായ മത്സരങ്ങളിൽ ഉപയോഗിച്ച, ഷൂസ്, സ്കാർഫുകൾ, ടിക്കറ്റുകൾ, പോസ്റ്ററുകൾ, ഔദ്യോഗിക രേഖകൾ, തുടങ്ങിയവയും പുരാവസ്തുക്കളും ഉൾപ്പെടുത്തിയതാണ് പ്രധാന വിഭാഗമായ 'ഹിസ്റ്ററി ഇൻ ദ മേക്കിംഗ്'.1930ലെ ആദ്യ ലോകകപ്പ് മുതൽ അർജന്റീനിയൻ ഫുട്ബോൾ താരം ഡീഗോ മറഡോണ ധരിച്ചിരുന്ന ജഴ്‌സി ഉൾപെടെ ലോകകപ്പ് ചരിത്രത്തിലെ ഇതിഹാസ താരങ്ങൾ ധരിച്ചിരുന്ന ജഴ്‌സികൾ പ്രദർശനത്തിലുണ്ടാവും.ഇതിനു പുറമെ,ഫുട്ബോൾ ചരിത്രത്തിൾ സുവർണ ഗോളുകൾ തീർത്ത ബ്രസീലിന്റെ ഇതിഹാസ താരം പെലെയുടെ വലതുകാലിന്റെ വെങ്കല രൂപവും പ്രദർശനത്തിലെ സവിശേഷതയാണ്.
നാഷണൽ ഫുട്ബോൾ മ്യൂസിയം, സ്വിറ്റ്സർലൻഡിലെ ഫിഫ മ്യൂസിയം, ഫ്രാൻസിലെ നാഷണൽ സ്പോർട്സ് മ്യൂസിയം തുടങ്ങിയ പ്രാദേശിക, അന്തർദേശീയ സ്ഥാപനങ്ങളിൽ നിന്നും വ്യക്തികളിൽ നിന്നും താൽകാലികമായി ശേഖരിച്ച പുരാവസ്തുക്കളും ഫോട്ടോഗ്രാഫുകളും അത്യപൂർവ സിനിമകളുടെ പ്രിന്റുകളുമാണ് പ്രദർശനത്തിനായി മ്യുസിയത്തിൽ പ്രദർശനത്തിനായി ഒരുക്കിയിട്ടുള്ളത്.
.പ്രദർശനം 2023 ഏപ്രിൽ 1 വരെ തുടരും.
ഖത്തറിൽ താമസവിസയുള്ളവർക്ക് പ്രവേശനം സൗജന്യമായിരിക്കും.പുറത്തുനിന്നുള്ള 16 വയസ്സിന് മുകളിൽ പ്രായമുള്ള മുതിർന്നവർക്ക് 50 റിയാലാണ് ടിക്കറ്റ് നിരക്ക്.രാവിലെ 9 മുതൽ വൈകീട്ട് 7 മണി വരെയാണ് സന്ദർശകർക്കുള്ള സമയം.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/HU1j0QE7i26GnMur8CmUvF എന്ന ലിങ്കിൽ ജോയിൻ ചെയ്യുക
