October 29, 2021
October 29, 2021
ദുബൈ: അടുത്ത ബന്ധുക്കളുടെ മരണമടക്കമുള്ള അടിയന്തിര ആവശ്യങ്ങൾക്കായി വിദേശത്ത് നിന്നും ഇന്ത്യയിൽ എത്തുന്നവർക്ക് നൽകിയിരുന്ന ഇളവുകൾ ഇനി നൽകില്ലെന്ന് കേന്ദ്രം. ഇതിനായി 'എയർ സുവിധ' വെബ്സൈറ്റിൽ ഉണ്ടായിരുന്ന പ്രത്യേക സംവിധാനം എടുത്തുകളയുകയും ചെയ്തിട്ടുണ്ട്. ഇതോടെ, 72 മണിക്കൂർ മുൻപ് ചെയ്ത കോവിഡ് ടെസ്റ്റിന്റെ ഫലം കൈവശമുള്ളവർക്ക് മാത്രമേ ഇന്ത്യയിലേക്ക് യാത്ര ചെയ്യാനൊക്കൂ
വിദേശത്ത് നിന്നും നാട്ടിലേക്ക് തിരിക്കുന്നവർക്ക് വിവരങ്ങൾ അപ്ലോഡ് ചെയ്യാനായി കേന്ദ്രമൊരുക്കിയ സംവിധാനമാണ് 'എയർ സുവിധ'. വ്യക്തിഗതവിവരങ്ങളും, 72 മണിക്കൂർ മുൻപുള്ള കോവിഡ് പരിശോധനാ ഫലവുമാണ് സുവിധയിൽ നൽകേണ്ടത്. എന്നാൽ, അടിയന്തരമായി ഇന്ത്യയിലേക്ക് പുറപ്പെടുന്നവർക്ക് സൈറ്റിലുള്ള എക്സംപ്ഷൻ എന്ന ലിങ്ക് ക്ലിക്ക് ചെയ്ത് മരണസർട്ടിഫിക്കറ്റ് ഹാജരാക്കിയാൽ കോവിഡ് ടെസ്റ്റ് ഒഴിവാക്കാമായിരുന്നു. ഈ സൗകര്യമാണ് കേന്ദ്രസർക്കാർ പിൻവലിച്ചത്. ഇന്ത്യയിൽ എത്തിയാലുടൻ വീണ്ടും കോവിഡ് ടെസ്റ്റ് ചെയ്യണമെന്ന നിയമം ഉണ്ടായിരിക്കെ ആണ് യാത്രക്ക് മുൻപും ടെസ്റ്റ് വേണമെന്ന അധികൃരുടെ പിടിവാശി. പല രാജ്യങ്ങളിലും കോവിഡ് ടെസ്റ്റിന്റെ ഫലമറിയാൻ പത്തുമണിക്കൂറോളം വേണമെന്നതിനാൽ അടിയന്തിരമായി യാത്ര ചെയ്യുന്നവർക്ക് വലിയ വെല്ലുവിളിയാണ് ഈ പുതിയ നിർദ്ദേശം.