October 10, 2021
October 10, 2021
ദോഹ : വിസാ രേഖകളിലെ തെറ്റ് തിരുത്താൻ ഖത്തർ പ്രവാസികൾക്ക് ഇന്ന് മുതൽ അവസരം. 2015 ലെ നിയമവ്യവസ്ഥകൾ പാലിക്കാതെ ഖത്തറിൽ തുടരുന്ന പ്രവാസികൾക്ക് ഇന്ന് മുതൽ ഡിസംബർ 31 വരെയാണ് തെറ്റുകൾ തിരുത്താൻ കാലാവധി നൽകിയിരിക്കുന്നത്. നിയമലംഘനം നടത്തിയവർ അപേക്ഷ സമർപ്പിച്ചാൽ പിഴ ഒഴിവാക്കുകയോ, ഇളവ് നൽകുകയോ ചെയ്യുമെന്ന് അധികൃതർ അറിയിച്ചു.
താമസചട്ടം ലംഘിച്ചവർ, തൊഴിൽ വിസാ ചട്ടം ലംഘിച്ചവർ, കുടുംബ സന്ദർശന വിസാ ചട്ടം ലംഘിച്ചവർ എന്നിവർക്കാണ് ഈ അവസരം പ്രയോജനപ്പെടുക. സേർച്ച്‌ ആൻഡ് ഫോളോ അപ്പ് ഡിപ്പാർട്ട്മെന്റിലോ, ഉമ്മു സലാൽ, ഉമ്മു സുനൈം, മിസൈമിർ, വക്‌റ, റയ്യാൻ എന്നിവിടങ്ങളിലുള്ള ആഭ്യന്തര മന്ത്രാലയത്തിന്റെ സേവന കേന്ദ്രങ്ങളിലോ ഇതിനായുള്ള അപേക്ഷ നൽകാവുന്നതാണ്. ഉച്ചയ്ക്ക് ഒന്ന് മുതൽ വൈകീട്ട് ആറ് വരെയാണ് ഈ കേന്ദ്രങ്ങളിൽ അപേക്ഷ സ്വീകരിക്കുക. ഈ അവസരം വിനിയോഗിച്ച് രേഖകൾ ശരിയാക്കിയില്ലെങ്കിൽ കടുത്ത നടപടികൾ നേരിടേണ്ടി വരുമെന്ന് അധികൃതർ ഓർമിപ്പിച്ചു.
