November 14, 2021
November 14, 2021
ദോഹ : ഈ മാസം അവസാനവാരത്തിൽ ആരംഭിക്കുന്ന ഫിഫ അറബ് കപ്പിനായി അണിഞ്ഞൊരുങ്ങുകയാണ് ദോഹ കോർണിഷ്. കളി കാണാനെത്തുന്ന സന്ദർശകർക്കായി നിരവധി സർപ്രൈസുകളാണ് കോർണിഷിൽ ഒരുങ്ങുന്നത്. ടൂർണമെന്റിനോടനുബന്ധിച്ച് കരിമരുന്ന് പ്രയോഗവും, സംഗീതാത്മകമായ വാട്ടർഷോയും കോർണിഷിൽ നടക്കുമെന്ന് സംഘാടകർ വ്യക്തമാക്കി. ഇതോടൊപ്പം, അൽ ബിദ്ദ പാർക്കിലും കോർണിഷ് സ്ട്രീറ്റിലും ഭക്ഷ്യമേളയും നടക്കും. നവംബർ 26 മുതൽ ഡിസംബർ 4 വരെ സ്വകാര്യവാഹനങ്ങൾക്ക് കോർണിഷിലേക്ക് പ്രവേശിക്കാൻ കഴിയില്ല. ദോഹ മെട്രോ സർവീസും കർവ ബസ്സുകളും അടങ്ങുന്ന പൊതുഗതാഗതമാർഗങ്ങൾ ഉപയോഗിച്ച് വേദികളിൽ യാത്ര ചെയ്യാം. ഭക്ഷ്യമേളകൾ ഉച്ചയ്ക്ക് 3 മുതൽ രാത്രി 11 മണിവരെയാണ് പ്രവർത്തിക്കുക. വാരാന്ത്യദിവസങ്ങളിൽ രാത്രി 1 മണി വരെ സേവനം ലഭ്യമാവും. പന്ത്രണ്ടോളം ഭക്ഷ്യ ട്രക്കുകളും, 145 സ്റ്റാളുകളുമാണ് മേളയിൽ ഉണ്ടാവുക. ടൂർണമെന്റിന്റെ ആവേശം വർധിപ്പിക്കാൻ ഖത്തറിന്റെ ചരിത്രത്തിലെ ഏറ്റവും വലിയ എൽഇഡി സ്ക്രീനും കോർണിഷിന്റെ മാറ്റ് കൂട്ടും.
