December 09, 2021
December 09, 2021
ദോഹ : സൗദി രാജകുമാരന്റെ സന്ദർശനത്തിന് പിന്നാലെ ബഹ്റൈൻ കിരീടാവകാശി സൽമാൻ ബിൻ ഹമദ് അൽ ഖലീഫയും ദോഹയിൽ എത്തുമെന്ന് റിപ്പോർട്ടുകൾ. പ്രമുഖ മാധ്യമപ്രവർത്തകനായ ജാബിർ അൽ ഹറമിയാണ് ഇതുസംബന്ധിച്ചുള്ള സൂചനകൾ പുറത്തുവിട്ടത്. റിയാദുമായുള്ള നയതന്ത്രബന്ധം പുനഃസ്ഥാപിച്ച ദോഹയ്ക്ക്, ബഹ്‌റൈന്റെ ആസ്ഥാനമായ മനാമയുമായും കരാറുകളിൽ ഏർപ്പെടാൻ ഇതോടെ സാധിക്കുമെന്നാണ് കരുതപ്പെടുന്നത്.
ഖത്തറിന് മറ്റ് ഗൾഫ് രാജ്യങ്ങൾ ഉപരോധം ഏർപ്പെടുത്തിയ സമയത്ത് ബഹ്റൈനുമായുള്ള ബന്ധത്തിന് വിള്ളൽ വീണിരുന്നു. ഈ പ്രശ്നങ്ങൾ പരിഹരിച്ച്, വീണ്ടും സൗഹൃദം പുലർത്താൻ ഈ സന്ദർശനം കാരണമാവുമെന്നാണ് ജാബിർ ഹറമിയുടെ നിരീക്ഷണം. ഇരു രാജ്യങ്ങളും ഇതുവരെ ഇത്തരമൊരു സന്ദർശനത്തെ കുറിച്ച് ഔദ്യോഗികമായി പ്രതികരിച്ചിട്ടില്ല. 41ആം ജീസിസി ഉച്ചകോടിയിലെ അൽ ഉല ഉടമ്പടിയിലൂടെ ഖത്തറിന് മേൽ ഏർപ്പെടുത്തിയ ഉപരോധം നീക്കിയെങ്കിലും, ബഹ്റൈൻ ഇതുവരെ ഖത്തറുമായുള്ള ബന്ധം പുനഃസ്ഥാപിക്കാൻ നടപടികൾ സ്വീകരിച്ചിട്ടില്ല. സൗദി, യുഎഇ, ഈജിപ്ത് തുടങ്ങിയ രാജ്യങ്ങൾ ഖത്തറുമായി വീണ്ടും കരാറുകളിൽ ഏർപ്പെടാൻ തീരുമാനിച്ചെങ്കിലും, ബഹ്റൈൻ പഴയ നിലപാടിൽ ഉറച്ചുനിൽക്കുകയാണ്.
