June 17, 2021
June 17, 2021
ദോഹ: ദോഹയിലെ ആസ്‌പെയര്‍ ടവര്‍ ത്രിമാന രൂപത്തിൽ ചിത്രീകരിച്ച മലയാളിക്ക് നേട്ടം. ത്രീഡി മോഡലേഴ്‌സായ ഹൂം 3 ഡി നടത്തിയ വിത്തൗട്ട് ബോര്‍ഡേഴ്‌സ് 3 -ഡി ചലഞ്ചില്‍ പങ്കെടുത്ത കണ്ണൂര്‍ എടക്കാട് സ്വദേശിക്കാണ് വിജയമുണ്ടായത്. എടക്കാട്ടെ എം.കെ. മുഹമ്മദ് റമീസാണ് ഒന്നാം സ്ഥാനം നേടിയത്. തങ്ങളുടെ രാജ്യത്തെ പ്രശസ്തമായ കെട്ടിടത്തിന്റെ ത്രിമാന ചിത്രം തയാറാക്കാനുള്ള മത്സരത്തില്‍ ഇദ്ദേഹം ദോഹയിലെ ആസ്‌പെയര്‍ ടവര്‍ ചിത്രീകരിക്കുകയായിരുന്നു. ലോകത്തെ അറിയപ്പെടുന്ന ത്രീഡി ആര്‍ട്ടിസ്റ്റുകളടങ്ങിയ ജൂറി തെരഞ്ഞെടുത്ത വിജയിക്ക് ഒമ്പത് ലക്ഷം രൂപ വിലവരുന്ന ആധുനിക സോഫ്റ്റുവെയറുകളും മറ്റ് ടൂളുകളുമാണ് സമ്മാനമായി നല്‍കുക.ഖത്തറിലെ പ്രമുഖ കമ്പനിയില്‍ ഫോറന്‍സിക് 3 ഡി അനിമേഷന്‍ സ്‌പെഷലിസ്റ്റായി ജോലി ചെയ്യുകയാണ് മുഹമ്മദ് റമീസ്. എടക്കാട്ടെ സാവന്നയിലെ മേലേക്കണ്ടി എം.കെ. മറിയുവിന്റെയും കെ.പി. റഫീഖിന്റെയും മകനാണ്.
