January 28, 2020
January 28, 2020
ദോഹ : ഖത്തറിന്റെ പുതിയ പ്രധാനമന്ത്രിയായി ഷെയ്ഖ് ഖാലിദ് ബിൻ അബ്ദുൽ അസീസ് അൽതാനിയെ നിയമിച്ചതായി ഖത്തർ ന്യൂസ് ഏജൻസി റിപ്പോർട്ട് ചെയ്തു. ഖത്തർ അമീർ ഷെയ്ഖ് തമീം ബിൻ ഹമദ് അൽതാനിയാണ് ഇതുസംബന്ധിച്ച ഉത്തരവിറക്കിയത്. നിയമന ഉത്തരവ് സർക്കാർ ഗസറ്റിൽ പ്രസിദ്ധീകരിച്ച ശേഷമായിരിക്കും പ്രധാനമന്ത്രി ചുമതലയേൽക്കുക.
നിലവിലെ പ്രധാനമന്ത്രി ഷെയ്ഖ് അബ്ദുല്ല ബിൻ നാസർ ബിൻ ഖലീഫാ അൽതാനിയുടെ രാജി അമീർ സ്വീകരിച്ചു. തന്റെ സേവനകാലത്ത് അമീർ നൽകിയ സഹകരണത്തിനും മാർഗനിർദേശങ്ങൾക്കും മുൻ പ്രധാനമന്ത്രി നന്ദി അറിയിച്ചു. തന്നെ ഏൽപിച്ച ദൗത്യം സത്യസന്ധതയോടെയും ആത്മാർത്ഥമായും നിർവഹിക്കാൻ സാധിച്ചതായും അദ്ദേഹം ആത്മവിശ്വാസം പ്രകടിപ്പിച്ചു.
നിലവിൽ ഷെയ്ഖ് ഖാലിദ് ബിൻ അബ്ദുൽ അസീസ് അൽതാനി അമീരി ദിവാനിയുടെ പ്രധാന ചുമതല വഹിച്ചു വരികയാണ്.നേരത്തെ അമീരി ഓഫീസിന്റെ ഡയറക്റ്ററായിരുന്നു.
