September 20, 2019
September 20, 2019
പാരീസ് : ഖത്തര് അമീര് ശൈഖ് തമീന് ബിന് ഹമദ് അൽതാനി ഫ്രഞ്ച് പ്രസിഡന്റ് ഇമ്മാനുവല് മാക്രോണുമായി കൂടിക്കാഴ്ച നടത്തി. ഫ്രഞ്ച് പ്രസിഡന്റിന്റെ വസതിയായ എലിസീ കൊട്ടാരത്തില് വച്ചായിരുന്നു കൂടിക്കാഴ്ച.
ഖത്തറും ഫ്രാന്സും തമ്മില് നയതന്ത്ര-പ്രതിരോധ-വ്യാപാര സഹകരണം ശക്തമാക്കുന്നതിനെ കുറിച്ച് ഇരുനേതാക്കളും ചര്ച്ച ചെയ്തു. പശ്ചിമേഷ്യയിലും രാജ്യാന്തര തലത്തിലുമുള്ള പുതിയ രാഷ്ട്രീയ സംഭവവികാസങ്ങളും കൂടിക്കാഴ്ചയില് ചര്ച്ചയായി. വിവിധ മേഖലകളില് സഹകരണത്തിനു ധാരണയായതായാണു വിവരം.
കൊട്ടാരത്തില് ഒരുക്കിയ പ്രത്യേക വിരുന്നിലും പങ്കെടുത്ത ശേഷമാണ് അമീര് പാരീസ് വിട്ടത്. വിരുന്നില് അമീറിനെ അനുഗമിച്ച ഖത്തര് പ്രതിനിധി സംഘവും ഫ്രഞ്ച് മന്ത്രിമാരും പങ്കെടുത്തു. ബുധനാഴ്ച വൈകിട്ടാണ് അമീര് പാരീസില് എത്തിയത്.
ന്യൂയോര്ക്കിലെ ഐക്യരാഷ്ട്രസഭാ ആസ്ഥാനത്ത് നടക്കുന്ന യു.എന് പൊതുസഭയുടെ 74-ാമത് സമ്മേളനത്തിലും അമീര് പങ്കെടുക്കും. ചൊവ്വാഴ്ച സമ്മേളനത്തെ അദ്ദേഹം അഭിസംബോധന ചെയ്യും. പുതിയ ബ്രിട്ടീഷ് പ്രധാനമന്ത്രി ബോറിസ് ജോണ്സണുമായി കൂടിക്കാഴ്ച നടത്തിയ ശേഷമാകും അമീറും സംഘവും നാട്ടിലേക്കു തിരിക്കുക.