October 17, 2021
October 17, 2021
അടുത്ത വർഷം ഖത്തറിൽ അരങ്ങേറുന്ന കാല്പന്തിന്റെ ഉത്സവത്തിന് സുരക്ഷ ഒരുക്കാൻ അമേരിക്കയും. തീവ്രവാദ ആക്രമണം അടക്കമുള്ള ഏത് തരം പ്രശ്നങ്ങൾ ഉയർന്നുവന്നാലും ചെറുക്കാൻ അമേരിക്ക ഉണ്ടാവുമെന്ന് അമേരിക്കൻ ഗവണ്മെന്റ് പ്രതിനിധിയാണ് പ്രഖ്യാപിച്ചത്. ലുസൈൽ ന്യൂസിനോട് സംസാരിക്കവെ ആണ് അംബാസിഡറും, തീവ്രവാദത്തെ ചെറുക്കാൻ അമേരിക്ക ഒരുക്കിയ പ്രത്യേകസംഘത്തിന്റെ മുൻ മേധാവി കൂടിയായ നഥാൻ സെയിൽസ് ഈ വാർത്ത പുറത്തുവിട്ടത്.
തീവ്രവാദത്തിനെതിരെ സന്ധിയില്ലാത്ത പോരാട്ടമാണ് ഇരുരാജ്യങ്ങളും ചേർന്ന് നയിക്കുന്നതെന്നും, തീവ്രവാദത്തിനായി പണമൊഴുകുന്നത് തടയാനും ഖത്തർ-അമേരിക്ക കൂട്ടുകെട്ടിന് കഴിഞ്ഞു എന്നും ഇദ്ദേഹം അഭിപ്രായപ്പെട്ടു. 2017 ൽ ഖത്തറും അമേരിക്കയും ചേർന്ന് ഒപ്പുവെച്ച മെമ്മോറാണ്ടം, തീവ്രവാദത്തിനെതിരായ പോരാട്ടത്തിൽ നിർണ്ണായക ഏടായി മാറിയെന്നും സെയിൽസ് അഭിപ്രായപ്പെട്ടു. ഇതേ മെമ്മോറാണ്ടം ചൂണ്ടിക്കാട്ടിയാണ് ഖത്തർ ലോകകപ്പിന്റെ സുരക്ഷാ ചുമതല ഇരുരാജ്യങ്ങളും പങ്കിടുമെന്ന് അമേരിക്കൻ വക്താവ് അറിയിച്ചത്. ലോകമെങ്ങും ഉളള ആളുകളെ ഒന്നിപ്പിക്കുന്ന കാര്യങ്ങളിൽ ഒന്നാണ് കായികമത്സരങ്ങൾ എന്നും, അവ സുരക്ഷിതമാണെന്ന് ഉറപ്പുവരുത്തേണ്ടത് തങ്ങളുടെ കടമയാണെന്നും സെയിൽസ് കൂട്ടിച്ചേർത്തു.