February 23, 2022
February 23, 2022
ദോഹ : രാജ്യത്തെ പ്രധാന പൈതൃക കേന്ദ്രങ്ങളിൽ ഒന്നായ അൽ റഖിയത് കോട്ടയുടെ നവീകരണം പൂർത്തിയായതായി പുരാവസ്തു സംരക്ഷണ ചുമതലയുള്ള മ്യൂസിയം ഡിപ്പാർട്ട്മെന്റ് അറിയിച്ചു. ഖത്തറിന്റെ വടക്കുകിഴക്ക് ഭാഗത്തായി നിലകൊള്ളുന്ന ഈ കോട്ട സമാനതകളില്ലാത്ത വാസ്തുശില്പവൈദഗ്ദ്യത്തിന് ഉദാഹരണമാണ്. പതിനേഴാം നൂറ്റാണ്ടിനും പത്തൊൻപതാം നൂറ്റാണ്ടിനും ഇടയിലായാണ് അൽ റഖിയത് കോട്ട നിർമ്മിക്കപ്പെട്ടത് എന്നാണ് ചരിത്രരേഖകൾ സൂചിപ്പിക്കുന്നത്.
ദേശീയ വിഷൻ 2030 പദ്ധതിയുടെ ഭാഗമായാണ് കോട്ടയിൽ അറ്റകുറ്റപണികൾ നടത്തിയത്. പഴമയുടെ പ്രൗഢി ഒട്ടും ചോരാതെ നടത്തിയ നവീകരണപ്രക്രിയയിൽ, ആവശ്യമായ മാറ്റങ്ങൾ മാത്രമേ വരുത്തിയിട്ടുള്ളൂ എന്ന് അധികൃതർ വ്യക്തമാക്കി. വരും തലമുറയ്ക്കായി ചരിത്രസ്മാരകങ്ങൾ സംരക്ഷിക്കുക എന്നത് തങ്ങളുടെ കടമ ആണെന്നായിരുന്നു ഖത്തർ മ്യൂസിയം മേധാവി അബ്ദുൾ ലത്തീഫ് മസ്ലമാനിയുടെ പ്രതികരണം. അറബിക് ഭാഷയിൽ കിണർ എന്നർത്ഥം വരുന്ന ഈ കോട്ട, പഴയകാലത്ത് ശുദ്ധജലം സൂക്ഷിക്കാനാണ് ഉപയോഗിച്ചിരുന്നത്.