May 11, 2023
May 11, 2023
ന്യൂസ്റൂം ബ്യൂറോ
ദോഹ: 51-ാമത് അമീര് കപ്പ് ഫുട്ബോള് ഫൈനല് മത്സരത്തിനൊരുങ്ങി ഖത്തര്. അഹമ്മദ് ബിന് അലി സ്റ്റേഡിയത്തില് നാളെ കാല്പന്തുകളിയുടെ ആരവം ഉയരും. അല് സദ്ദും അല് അറബിയും തമ്മിലാണ് പോരാട്ടം.
ആവേശകരമായ ക്യുഎന്ബി സ്റ്റാര്സ് ലീഗ് മത്സരത്തിന് ശേഷമാണ് 18 തവണ അമീര് കപ്പ് ജേതാക്കളായ അല് സദ്ദും 8 തവണ ജേതാക്കളായ അല് അറബിയും വെള്ളിയാഴ്ച അമീര് കപ്പ് സ്വന്തമാക്കാന് ഒരുങ്ങുന്നത്. 2020ല് അല് സദ്ദും അല് അറബിയും തമ്മിലായിരുന്നു പോരാട്ടം. മത്സരത്തില് ഒന്നിനെതിരെ 2 ഗോളുകള്ക്ക് അല് അറബിയെ പരാജയപ്പെടുത്തി അല് സദ്ദ് ചാംപ്യന്മാരായി.
നാളെ വൈകീട്ട് 7 മണിക്കാണ് മത്സരം. മത്സരത്തിന് 3 മണിക്കുമുന്നേ കാണികളെത്തിയാല് തിരക്ക് ഒഴിവാക്കാമെന്ന് അധികൃതര് അറിയിച്ചു. കാണികള്ക്കെത്താന് സ്റ്റേഡിയത്തിലേക്കുള്ള എല്ലാ റോഡുകളിലും സുരക്ഷിതമായ ഗതാഗത ക്രമീകരണങ്ങളും പൂര്ത്തിയായി. വാഹനത്തിലെത്തുന്ന കാണികള്ക്ക് സ്റ്റേഡിയത്തോടു ചേര്ന്ന വിശാലമായ വാഹന പാര്ക്കിങ് സൗകര്യം പ്രയോജനപ്പെടുത്താം. കര്വ ബസ്, ദോഹ മെട്രോ ഉള്പ്പടെയുള്ള പൊതു ഗതാഗത സംവിധാനവും കാണികള്ക്ക് ഉപയോഗപ്പെടുത്താവുന്നതാണ്. മത്സരത്തോടനുബന്ധിച്ച് പുലര്ച്ചെ 1വരെ മെട്രോ സര്വീസ് ലഭ്യമാകും. മിഷെറീബ് ഡൗണ്ടൗണ് ദോഹയിലെ ബരാഹത് മിഷെറീബില് അമീര് കപ്പ് മത്സരം ഭീമന് സ്ക്രീനില് തല്സമയം കാണാനാകും.
ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക https://chat.whatsapp.com/GNnAPz2ISv601MKXQvNitL