November 15, 2022
November 15, 2022
ന്യൂസ്‌റൂം സ്പോർട്സ് ഡെസ്‌ക്
ദോഹ : ഖത്തർ ലോകകപ്പിന് അഞ്ച് ദിവസങ്ങൾ മാത്രം ശേഷിക്കെ,ലോകകപ്പുമായി ബന്ധപ്പെട്ട ഓരോ വിശേഷങ്ങളും ആശങ്കകളും പരസ്പരം പങ്കുവെച്ചും സുഹൃത്തുക്കളുമായി തർക്കിച്ചുമാണ് മലയാളികളായ ആരാധകർ സമയം തള്ളിനീക്കുന്നത്.അവരുടെ വീട്ടുമുറ്റത്ത് നടക്കുന്ന ആദ്യലോകകപ്പെന്ന വൈകാരിക അടുപ്പം കൂടി അവർക്ക് ഈ ലോകകപ്പിനോടുണ്ട്.
ഇതിനിടെ, ഫിഫയുടെ ഔദ്യോഗിക ഫേസ്‍ബുക്കില്‍ പോസ്റ്റ് ചെയ്ത കവർ ചിത്രത്തിൽ നിന്ന് തങ്ങളുടെ ഇതിഹാസ താരം നെയ്മറെ നൈസായി ഒഴിവാക്കിയെന്ന ആക്ഷേപവുമായി മലയാളികൾ അവിടെയും പരിഭവവും ആക്ഷേപവും ന്യായീകരണവുമൊക്കെയായി രംഗം കൊഴുപ്പിക്കുകയാണ്.ഫിഫയുടെ കവർ ചിത്രത്തിന് കീഴെ കൂടുതല്‍ കമന്‍റുകളും മലയാളത്തിലാണ് എന്നതാണ് സവിശേഷത.ഒടുവിൽ നെയ്മറെ ഒഴിവാക്കിയിട്ടില്ലെന്ന് വിശദീകരിച്ച് ഫിഫ തന്നെ അടുത്ത ചിത്രവും പോസ്റ്റ് ചെയ്യേണ്ടിവന്നു.
ഫിഫയ്ക്ക് പോലും വേണ്ടാ എന്ന പരിഹാസത്തോടെ അർജന്‍റീനയടക്കമുള്ള ടീമുകളുടെ ഫാന്‍സ് രംഗത്തെത്തിയതോടെയാണ് ഈ പോസ്റ്റിന് താഴെ കമന്‍റ് യുദ്ധം ആരംഭിച്ചത്. ബ്രസീലിനെ കിരീടം നേടാനുള്ള ടീമായി പോലും ഫിഫ കാണുന്നില്ല എന്ന് ഇക്കൂട്ടർ വാദിക്കുന്നു. നൈസായി ഒഴിവാക്കിയല്ലേ എന്ന് നെയ്മർ പരിതപിക്കുന്നതും നെയ്മറുടെ ചിത്രമില്ലാത്ത ഫിഫ ലോകകകപ്പ് ബഹിഷ്കരിക്കും എന്ന തരത്തിലുള്ള ട്രോളുകളും കവർ ചിത്രത്തിന് താഴെ കാണാം.കേരളത്തിലെ രാഷ്ട്രീയവഴക്കുകൾ വരെ പേജിൽ കമന്റുകളായി വരുന്നുണ്ട് എന്നതാണ് ഏറെ രസകരം.
എന്തായാലും മലയാളി ആരാധകരുടെ കളിയാവേശത്തിന്റെ ഉശിരും ചൂടും ഫിഫ ഒരിക്കല്‍ക്കൂടി തിരിച്ചറിയുകയാണ്. നേരത്തെ പുള്ളാവൂരിലെ മെസി-നെയ്മർ-റോണോ കട്ടൗട്ടുകൾ ഫിഫ സാമൂഹ്യമാധ്യമങ്ങളില്‍ പങ്കുവെച്ചതിനെ തുടർന്ന് കേരളത്തിലെ ഫുട്ബോള്‍ കമ്പം ലോകമാധ്യമങ്ങൾ ഒന്നടങ്കം ഏറ്റെടുത്തിരുന്നു.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/FxcpaKzzbtR4LadT0rnH7K എന്ന ലിങ്കിൽ ജോയിൻ ചെയ്യുക
