March 07, 2022
March 07, 2022
മുസ്‌ലിം ലീഗിന്റെ സംസ്ഥാന അധ്യക്ഷനായി പാണക്കാട് സാദിഖലി ശിഹാബ് തങ്ങളെ തിരഞ്ഞെടുത്തു. അധ്യക്ഷൻ ഹൈദരലി ശിഹാബ് തങ്ങൾ വിടവാങ്ങിയ സാഹചര്യത്തിൽ, ഉന്നതാധികാര സമിതി യോഗം കൂടിയാണ് തീരുമാനമെടുത്തത്. ഉന്നതാധികാര സമിതിയിൽ അംഗമായ സാദിഖലി തങ്ങൾ, ലീഗിന്റെ മലപ്പുറം ജില്ലാ പ്രസിഡന്റാണ്. സംസ്ഥാന അധ്യക്ഷ പദവിയോടൊപ്പം രാഷ്ട്രീയകാര്യ സമിതി ചെയർമാനായും സാദിഖലി തങ്ങളെ നിയോഗിച്ചിട്ടുണ്ട്.
ഹൈദരലി തങ്ങൾ അസുഖബാധിതനായപ്പോൾ സാദിഖലി തങ്ങളാണ് പാർട്ടിയുടെ താൽകാലിക അധ്യക്ഷത വഹിച്ചത്. അർബുദ ബാധിതനായി ചികിത്സയിൽ ഇരിക്കെയാണ് ഹൈദരലി തങ്ങൾ അന്തരിച്ചത്. എറണാകുളത്തെ അങ്കമാലി ലിറ്റിൽ ഫ്‌ളവർ ആശുപത്രിയിലായിരുന്നു മരണം. വൻ ജനാവലിയെ സാക്ഷിയാക്കി ഇന്നലെ പുലർച്ചെ രണ്ടരയോടെയാണ് ഖബറടക്കം പൂർത്തിയാക്കിയത്. ഇന്ന് രാവിലെ ഖബറടക്കം നടത്തുമെന്നായിരുന്നു ആദ്യ അറിയിപ്പെങ്കിലും, സാഹചര്യം കണക്കിലെടുത്ത് നേരത്തേയാക്കുകയായിരുന്നു. പ്രിയ നേതാവിനെ ഒരുനോക്ക് കാണാൻ ആയിരങ്ങൾ പ്രവഹിച്ചതോടെ മലപ്പുറം ടൗൺ ഹാളിലെ പൊതുപ്രദർശനത്തിന്റെ ദൈർഖ്യവും വെട്ടിക്കുറക്കേണ്ടി വന്നിരുന്നു.
