November 24, 2021
November 24, 2021
രണ്ട് ദിവസങ്ങൾ നീണ്ടുനിന്ന ഖത്തർ സന്ദർശനത്തിനൊടുവിൽ ഒമാൻ ഭരണാധികാരി സുൽത്താൻ ഹൈതം ബിൻ ത്വാരിഖ് നാട്ടിലേക്ക് മടങ്ങി. ഒമാൻ പ്രതിരോധ- വിദേശവകുപ്പ് മന്ത്രിമാർ അടങ്ങിയ ഉന്നതതലസംഘവും ഖത്തർ സന്ദർശിച്ചിരുന്നു. ലോകകപ്പ് വേദികളും ഖത്തർ ഫൗണ്ടേഷനും സന്ദർശിച്ച ശേഷമാണ് ഒമാനിൽ നിന്നുള്ള സംഘം മടങ്ങിയത്.
ആദ്യദിനത്തിൽ ഫിഫ പ്രസിഡന്റ് ജിയാനി ഇൻഫന്റിനോയുമായി കൂടിക്കാഴ്ച നടത്തിയ ഒമാൻ സുൽത്താൻ, രണ്ടാം ദിവസമാണ് ലോകകപ്പ് സ്റ്റേഡിയങ്ങൾ സന്ദർശിച്ചത്. ലോകകപ്പിന്റെ ഉദ്ഘാടനവേദിയായ അൽ ബെയ്ത് സ്റ്റേഡിയത്തിൽ ഖത്തർ ഭരണാധികാരി ഷെയ്ഖ് തമീം ബിൻ ഹമദ് അൽതാനിക്ക് ഒപ്പമാണ് സുൽത്താൻ എത്തിയത്. മൈതാനത്തെ പരിശീലനസൗകര്യങ്ങളും, കാണികൾക്കായി ഒരുക്കിയ ഫാൻ സോണും ശീതീകരണ സംവിധാനവും വീക്ഷിച്ച ഒമാൻ ഭരണാധികാരി ഖത്തർ ഫൗണ്ടേഷൻ, നാഷണൽ ലൈബ്രറി തുടങ്ങിയ ഇടങ്ങളും സന്ദർശിച്ചു. വിവിധ ചരിത്രരേഖകളെയും കയ്യെഴുത്തുപ്രതികളെയും സുൽത്താന് പരിചയപ്പെടുത്തിക്കൊടുക്കാൻ ഖത്തർ സംഘവും അദ്ദേഹത്തെ അനുഗമിച്ചു.
