October 11, 2021
October 11, 2021
യൂറോപ്പിലെ പുത്തൻ ടൂർണമെന്റായ യുവേഫ നേഷൻസ് ലീഗിന്റെ രണ്ടാം പതിപ്പിൽ ഫ്രാൻസ് ജേതാക്കൾ. ഫൈനലിൽ സ്പെയിനിനെ ഒന്നിനെതിരെ രണ്ട് ഗോളുകൾക്ക് മറികടന്നാണ് ഫ്രാൻസ് കിരീടത്തിൽ മുത്തമിട്ടത്. ലോകകപ്പും, യൂറോകപ്പും,നേഷൻ ലീഗും സ്വന്തമാക്കുന്ന പ്രഥമരാജ്യമെന്ന റെക്കോർഡും ഇതോടെ ഫ്രാൻസിന്റെ പേരിലായി. ലൂസേഴ്‌സ് ഫൈനലിൽ ബെൽജിയത്തെ തോൽപിച്ച ഇറ്റലി മൂന്നാം സ്ഥാനം നേടി.
ഗോൾരഹിതമായ ആദ്യപകുതിക്ക് ശേഷം, ഒയോർസബാളിന്റെ ഗോളിലൂടെ സ്‌പെയിനാണ് ആദ്യം മുന്നിലെത്തിയത്. സെർജിയോ ബുസ്‌ക്വസിന്റെ പാസിൽ നിന്നും 64ആം മിനിറ്റിലാണ് താരം ഗോൾ നേടിയത്. രണ്ട് മിനിറ്റിനകം ഫ്രാൻസ് തിരിച്ചടിച്ചു. കരീം ബെൻസേമയുടെ മനോഹരമായൊരു ലോങ്ങ്‌ റേഞ്ചർ വലയിൽ പറന്നിറങ്ങുകയായിരുന്നു. മത്സരം അവസാനിക്കാൻ 10 മിനിറ്റ് ശേഷിക്കെ, എംബാപ്പെ ഫ്രാൻസിനെ മുന്നിലെത്തിച്ചു. ഒപ്പമെത്താനുള്ള സ്‌പെയിനിന്റെ ശ്രമങ്ങളെ ഗോൾകീപ്പർ ലോറിസ് തട്ടിയകറ്റിയതോടെ ഫ്രാൻസ് വിജയമുറപ്പിച്ചു.
