December 09, 2021
December 09, 2021
ദോഹ : കോവിഡിന്റെ പുതിയ വകഭേദം ലോകത്തിന്റെ വിവിധ ഭാഗങ്ങളിൽ റിപ്പോർട്ട് ചെയ്യപ്പെട്ടെങ്കിലും പൊതുസ്ഥലങ്ങളിൽ മാസ്ക് ധരിക്കുന്നതിൽ നേരത്തെ തന്നെ ആരോഗ്യമന്ത്രാലയം ഇളവുകൾ പ്രഖ്യാപിച്ചിരുന്നു. ഏതൊക്കെ ഇടങ്ങളിൽ ആണ് ഇപ്പോഴും മാസ്ക് നിർബന്ധം എന്ന കാര്യത്തിൽ പലർക്കും അവ്യക്തത നിലനിൽക്കുന്നുണ്ട്.
പൊതുജനങ്ങൾ അടുത്തിടപഴകുന്ന ഇൻഡോർ കെട്ടിടങ്ങളിൽ ഒക്കെയും ഫേസ് മാസ്ക് നിർബന്ധമാണ്. പള്ളികൾ, മാളുകൾ, സ്കൂളുകൾ, തൊഴിലിടങ്ങൾ, പൊതുഗതാഗതമാർഗങ്ങൾ തുടങ്ങിയ ഇടങ്ങളിൽ നിർബന്ധമായും മാസ്ക് അണിയണം. വിവാഹം, മരണാനന്തരചടങ്ങുകൾ മുതലായ പരിപാടികളിൽ പങ്കെടുക്കുന്നവരും മാസ്ക് ധരിക്കണം. അതേ സമയം, തുറസ്സായ ഇടങ്ങളിൽ നടത്തുന്ന പരിപാടികളിൽ മാസ്ക് അണിയേണ്ടതില്ല എന്നും ആരോഗ്യമന്ത്രാലയം വ്യക്തമാക്കിയിട്ടുണ്ട്. തുറസ്സായ സ്ഥലങ്ങളിൽ ആണെങ്കിലും, ജോലികളിൽ ഏർപ്പെടുന്ന വ്യക്തികൾ മറ്റുള്ളവരോട് ഇടപഴകേണ്ടി വരും എന്നതിനാൽ മാസ്ക് ധരിക്കണം. ഒമിക്രോൺ വകഭേദം രാജ്യത്ത് ഇതുവരെ റിപ്പോർട്ട് ചെയ്യപ്പെട്ടിട്ടില്ലെങ്കിലും, ജാഗ്രത വേണമെന്ന നിർദ്ദേശവും ആരോഗ്യമന്ത്രാലയം മുന്നോട്ടുവെച്ചിട്ടുണ്ട്.
