April 18, 2020
April 18, 2020
കുവൈത്ത് സിറ്റി / മസ്കത്ത് : കുവൈത്തിൽ ശനിയാഴ്ച ഒരാൾ കൂടി കോവിഡ് ബാധിച്ച് മരിച്ചു. ഇതോടെ രാജ്യത്തെ മരണ സംഖ്യ ആറായി. 68 വയസ്സുള്ള ബംഗ്ലാദേശ് പൗരനാണ് മരിച്ചത്. കഴിഞ്ഞ ഒരാഴ്ചക്കാലമായി തീവ്ര പരിചരണ വിഭാഗത്തിലായിരുന്നു ഇദ്ദേഹം. നേരത്തെ മൂന്ന് കുവൈത്ത് പൗരന്മാർ ഇറാൻ പൗരൻ , ഗുജറാത്ത് സ്വദേശി എന്നിവർ കോവിഡ് മൂലം മരിച്ചിരുന്നു.
93 പേർക്ക് കൂടി പുതുതായി കോവിഡ്19 സ്ഥിരീകരിച്ചതായും ആരോഗ്യമന്ത്രാലയം അറിയിച്ചു. ഇതോടെ രാജ്യത്തെ കോവിഡ് കേസുകളുടെ എണ്ണം 1751 ആയി.
ഇന്ന് രോഗം സ്ഥിരീകരിച്ചവരിൽ 64 പേർ ഇന്ത്യക്കാരാണ്. ഇതോടെ രാജ്യത്തെ കോവിഡ് ബാധിതരായ ഇന്ത്യക്കാരുടെ എണ്ണം 988 ആയി. പുതിയ രോഗികളിൽ ഇന്ത്യക്കാർ ഉൾപ്പെടെ 83 പേർക്കു നേരത്തെ കോവിഡ് സ്ഥിരീകരിച്ചവരുമായുള്ള സമ്പർക്കത്തെ തുടർന്നാണ് വൈറസ് ബാധിച്ചത്. വിവിധ രാജ്യക്കാരായ 10 പേർക്ക് രോഗം ബാധിച്ചത് എങ്ങിനെയെന്ന് വ്യക്തമായിട്ടില്ല.
ചികിത്സയിലുണ്ടായിരുന്നവരിൽ 22 പേർ കൂടി രോഗമുക്തി നേടിയതോടെ രാജ്യത്തു കോവിഡ് ഭേദമായവരുടെ എണ്ണം 280 ആയി. നിലവിൽ 1465 പേരാണ് ചികിത്സയിലുള്ളത്. ഇതിൽ 34 പേർ തീവ്രപരിചരണ വിഭാഗത്തിലാണ്. 18 പേരുടെ നില ഗുരുതരമാണെന്നും ആരോഗ്യമന്ത്രലായം വാർത്താസമ്മേളനത്തിൽ അറിയിച്ചു .
ഒമാനിൽ ശനിയാഴ്ച 111 പേരിൽ കൂടി പുതുതായി കോവിഡ് ബാധ സ്ഥിരീകരിച്ചു.ഇവരിൽ 78 പേർ സ്വദേശികളും 33 പേർ വിദേശരാജ്യങ്ങളിൽ നിന്നുള്ളവരാണെന്നും ഒമാൻ ആരോഗ്യ മന്ത്രാലയം അറിയിച്ചു. ഇതോടെ രാജ്യത്തെ മൊത്തം രോഗബാധിതരുടെ എണ്ണം 1180 ആയി. ഇതുവരെ ആറു പേർ ഒമാനിൽ കോവിഡ് ബാധിച്ച് മരണപ്പെട്ടിട്ടുണ്ട്.
ന്യുസ്‌റൂം വാർത്തകൾ മുടങ്ങാതെ വാട്സ്ആപ്പിൽ ലഭിക്കാൻ +974 66200167 എന്ന ഖത്തർ വാട്സ് ആപ് നമ്പറിലേക്ക് സന്ദേശമയക്കുക.
