February 12, 2024
February 12, 2024
അബുദാബി: യുഎഇയില്‍ നിന്ന് പ്രവാസികള്‍ നാട്ടിലേക്ക് അയക്കുന്ന പണത്തിന് യുഎഇ എക്‌സ്‌ചേഞ്ച് ഹൗസുകള്‍ ഫീസ് വര്‍ധിപ്പിക്കുന്നു. ഫീസ് നിരക്കില്‍ 15 ശതമാനം വര്‍ധനവാണ് ഉണ്ടാകുക. 2.50 ദിര്‍ഹത്തിന് (56.50 രൂപ) തുല്യമാണിത്. അഞ്ച് വര്‍ഷത്തിനിടെ ആദ്യമായാണ് എക്‌സ്‌ചേഞ്ച് ഹൗസുകള്‍ ഫീസ് വര്‍ധിപ്പിക്കാന്‍ ഒരുങ്ങുന്നത്. യുഎഇയുടെ അധികാര പരിധിയിലുള്ള എക്‌സ്‌ചേഞ്ച് ഹൗസുകള്‍ക്ക് ഓപ്ഷണല്‍ സ്ട്രാറ്റജിക് ഫീസ് ക്രമീകരണം നടപ്പിലാക്കാന്‍ അനുമതി ലഭിച്ചതായി ഫോറിന്‍ എക്‌സ്‌ചേഞ്ച് ആന്‍ഡ് റെമിറ്റന്‍സ് ഗ്രൂപ്പ് (എഫ്ഇആര്‍ജി) ഇന്ന് (തിങ്കള്‍) പ്രഖ്യാപിച്ചു. ഹൗസുകളിലെ വര്‍ധിച്ച ചെലവുകള്‍ പരിഹരിച്ച് മത്സരക്ഷമത നിലനിര്‍ത്തുന്നതിന്റെ ഭാഗമായാണിതെന്ന് അധികൃതര്‍ വ്യക്തമാക്കി.
മാറിക്കൊണ്ടിരിക്കുന്ന റെഗുലേറ്ററി അതോറിറ്റി നിയന്ത്രണങ്ങളും ചെലവ് വര്‍ധനവും കാരണം ഫീസ് വര്‍ധന അനിവാര്യമാണെന്ന് എക്‌സ്‌ചേഞ്ച് ഹൗസുകള്‍ നേരത്തേ പറഞ്ഞിരുന്നു. ഫിസിക്കല്‍ ബ്രാഞ്ച് റെമിറ്റന്‍സ് സേവനങ്ങള്‍ക്കും ഫീസ് വര്‍ധിപ്പിക്കുമെന്ന് പ്രതീക്ഷിക്കുന്നതായി എഫ്ഇആര്‍ജി പ്രസ്താവനയില്‍ കൂട്ടിച്ചേര്‍ത്തു. എക്‌സ്‌ചേഞ്ച് ഹൗസുകള്‍ക്ക് ഫീസ് ക്രമീകരണം അനുവദിക്കാനുള്ള തീരുമാനത്തെ സ്വാഗതം ചെയ്യുന്നതായി എഫ്ഇആര്‍ജി ചെയര്‍മാന്‍ മുഹമ്മദ് അല്‍ അന്‍സാരിയും പറഞ്ഞു.
അതേസമയം മൊബൈല്‍ ആപ്പ് വഴിയുള്ള പണമടയ്ക്കലില്‍ ഫീസ് നിരക്ക് മാറ്റമില്ലാതെ തുടരുകയോ കുറയ്ക്കുകയോ ചെയ്യുമെന്നാണ് പ്രതീക്ഷ.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/IocT7PQnr4MEYpMCPpqwIn
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
