January 10, 2024
January 10, 2024
ദോഹ: ഖത്തറില് വെള്ളിയാഴ്ച(ജനുവരി 12) ആരംഭിക്കുന്ന എഎഫ്സി ഏഷ്യന് കപ്പിന്റെ കിക്കോഫിന് ലുസൈല് സ്റ്റേഡിയം പൂര്ണ സജ്ജമെന്ന് അധികൃതര് അറിയിച്ചു. വൈകിട്ട് അഞ്ച് മണിക്ക് ഉദ്ഘാടന ചടങ്ങ് ആരംഭിക്കും. ഏഴ് മണിമുതല് ആരംഭിക്കുന്ന ഉദ്ഘാടന മത്സരത്തില് നിലവിലെ ചാംപ്യന്മാരും ആതിഥേയരുമായ ഖത്തര് ലെബനനെ നേരിടും. സ്റ്റേഡിയത്തില് ആരാധകര്ക്കായി ലൈവ് ഷോകള്, ഗെയിമിംഗ് ഏരിയകള്, ഭക്ഷണ- പാനീയ ട്രക്കുകള് എന്നിവ ഉള്പ്പെടുന്ന ഫാന് സോണ് സജ്ജീകരിക്കും. ടൂര്ണമെന്റിന്റെ ഭാഗ്യ ചിഹ്നങ്ങളായ സബൂഗ്, ടിംബികി, ഫ്രെഹ, സ്ക്രിതി, ട്രാനെഹ് എന്നിവരുമായി സംവദിക്കാനുള്ള അവസരവുമൊരുക്കും.
മത്സരത്തിന്റെ കിക്കോഫിന് അഞ്ച് മണിക്കൂര് മുമ്പ് ഗേറ്റുകള് തുറക്കും. ആരാധകരോട് നേരത്തെ സ്റ്റേഡിയത്തില് എത്തണമെന്നും അധികൃതര് നിര്ദേശിച്ചു. ടൂര്ണമെന്റിന്റെ എല്ലാ ടിക്കറ്റുകളും ഡിജിറ്റലായതിനാല് ഏത് മൊബൈല് ഉപകരണത്തില് നിന്നും ടിക്കറ്റുകള് കാണിക്കാമെന്നും അധികൃതര് വ്യക്തമാക്കി. അതേസമയം പ്രവേശനത്തിന് ഹയ്യ ആവശ്യമില്ല. വേദിയിലുടനീളം സഹായങ്ങള്ക്കായി വോളണ്ടിയര്മാരും ജീവനക്കാരുമുണ്ടാകും. ടൂര്ണമെന്റിന്റെ ഡിജിറ്റല് പ്ലാറ്റ്ഫോമുകളില് ലിസ്റ്റ് ചെയ്തിട്ടുള്ള നിരോധിത വസ്തുക്കളുമായി പ്രവേശനം അനുവദിക്കില്ലെന്നും എഎഫ്സി അധികൃതര് വ്യക്തമാക്കി.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/CIEQF0ymerI3E7Kl0Fortt
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F