October 09, 2022
October 09, 2022
ന്യൂസ്‌റൂം ബ്യുറോ
ജിദ്ദ : ലോകകപ്പ് മത്സരങ്ങൾ കാണാൻ ഖത്തറിലേക്ക് വരുന്നവർ സൗദി അറേബ്യ കൂടി സന്ദർശിക്കണമെന്നും തനത് അറേബ്യൻ അനുഭവം ആഗ്രഹിക്കുന്നവർക്ക് ഇത് നിർബന്ധമാണെന്നും അർജന്റീനൻ താരം ലയണൽ മെസ്സി.നേരത്തെ ജിദ്ദ സന്ദർശിച്ചപ്പോൾ പകർത്തിയ ചിത്രത്തോടൊപ്പം തന്റെ ഇൻസ്റ്റഗ്രാം പേജിലൂടെയാണ് മെസ്സി ഇക്കാര്യം ആവശ്യപ്പെട്ടത്.നിലവിൽ സൗദി ടൂറിസത്തിന്റെ ബ്രാൻഡ് അംബാസിഡറാണ് അദ്ദേഹം.
"നിങ്ങൾ ലോകകപ്പ് കാണാനാണ് വരുന്നതെങ്കിൽ, നിങ്ങൾക്ക് ആധികാരികമായ ഒരു അറേബ്യൻ അനുഭവം വേണം. സൗദി നിങ്ങൾക്കായി വാഗ്ദാനം ചെയ്യുന്നതൊന്നും നഷ്‌ടപ്പെടുത്തരുത്!'-അദ്ദേഹം കുറിച്ചു.
ഇക്കഴിഞ്ഞ മേയ് പത്തിനാണ് സൗദി ടൂറിസം മന്ത്രി അഹ്‍മദ് അല്‍ ഖാത്തിബ് മെസിയെ ടൂറിസം ബ്രാന്‍ഡ് അംബാസഡറായി പ്രഖ്യാപിച്ചത്. ഖത്തറിൽ നടക്കുന്ന ഫിഫ ലോകകപ്പ് 2022 കാണാൻ വരുന്നവർക്ക് അയല്‍ രാജ്യമായ സൗദി അറേബ്യ കൂടി സന്ദർശിക്കാൻ അവസരം നല്‍കുമെന്ന് നേരത്തെ അധികൃതര്‍ അറിയിച്ചിരുന്നു. ഫിഫ ലോകകപ്പിന്റെ ഭാഗമായി ഖത്തർ അനുവദിച്ച ‘ഹയ്യ’ കാർഡ് കൈവശമുള്ള ഫുട്ബാൾ ആരാധകർക്ക് വിസയില്ലാതെ തന്നെ സൗദിയിൽ പ്രവേശിച്ച് സൗദി അറേബ്യയിൽ രണ്ടുമാസം തങ്ങാനുള്ള വിസ നേടാൻ അവസരമുണ്ട്.
ലോകകപ്പ് ടിക്കറ്റുകൾ വാങ്ങിയ ശേഷം പ്രത്യേകം അപേക്ഷ നൽകിയാലാണ് ഹയ്യ കാർഡ് ലഭിക്കുക.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/Dg5TqG6OdNJIDasvwIm1qY എന്ന ലിങ്കിൽ ജോയിൻ ചെയ്യുക
