September 08, 2020
September 08, 2020
ജിദ്ദ: സാമൂഹിക പ്രവര്ത്തകനായ കണ്ണൂര് സ്വദേശി ജിദ്ദയില് വാഹനാപകടത്തില് മരിച്ചു. കണ്ണൂർ താണ സ്വദേശി അലക്കലകത്ത് മൂസ (63) ആണ് മരിച്ചത്. ചൊവ്വാഴ്ച ഉച്ചക്ക് മക്രോണ സ്ട്രീറ്റില് ഇദ്ദേഹം ജോലി ചെയ്യുന്ന ജിദ്ദ നാഷനല് ആശുപത്രിക്ക് മുന്നിൽ റോഡ് മുറിച്ചുകടക്കുന്നതിനിടെ സ്വദേശിയുടെ വാഹനം ഇടിച്ചാണ് അപകടമുണ്ടായത്. ജിദ്ദ സുലൈമാന് ഫഖീഹ് ആശുപത്രിയിലെത്തിച്ചെങ്കിലും ഇന്ന് വൈകീട്ടോടെ മരിക്കുകയായിരുന്നു.
35 വര്ഷത്തോളമായി സൗദിയില് പ്രവാസിയായ ഇദ്ദേഹം ദീര്ഘകാലം സൗദി കേബിള് കമ്പനിയിൽ ജീവനക്കാരനായിരുന്നു. കഴിഞ്ഞ രണ്ട് വര്ഷത്തോളമായി ജിദ്ദ നാഷനല് ആശുപത്രിയില് സപ്പോര്ട്ട് സര്വീസ് മാനേജറായി ജോലിചെയ്യുകയായിരുന്നു.
തനിമ സാംസ്കാരിക വേദി ജിദ്ദ സൗത്ത് കൂടിയാലോചന സമിതി അംഗം, മാനവീയം രക്ഷാധികാരി, കണ്ണൂര് ജില്ലാ വെല്ഫെയര് അസോസിയേഷന് സ്ഥാപക പ്രസിഡണ്ട്, അക്ഷരം വായനാവേദി അംഗം എന്നീ നിലകളില് സാമൂഹിക സാംസ്കാരിക ജീവകാരുണ്യ രംഗത്ത് സജീവമായിരുന്നു.
പിതാവ്: പരേതനായ അലക്കലകത്ത് ഹംസ, മാതാവ്: റാബിയ, ഭാര്യ: റുക്സാന (തനിമ ജിദ്ദ സൗത്ത് വനിതാ വിഭാഗം പ്രസിഡണ്ട്), മക്കള്: റയ്യാന് മൂസ (ജുബൈല്), ഡോ. നൗഷിന്, അബ്ദുല് മുഈസ് (മെഡിക്കല് വിദ്യാര്ത്ഥി), റുഹൈം മൂസ.
ന്യൂസ്റൂം വാർത്തകളും തൊഴിലവസരങ്ങളും അറിയാൻ ഈ വാട്സ്ആപ് ലിങ്കിൽ ചേരുക