November 24, 2021
November 24, 2021
അബുദാബി : 1200 കിലോമീറ്റർ നീളമുള്ള ഇത്തിഹാദ് റെയിൽ പദ്ധതിയിൽ പെടുന്ന ഒൻപത് തുരങ്കങ്ങളുടെയും നിർമാണം പൂർത്തിയായതായി അധികൃതർ. 600 തൊഴിലാളികൾ 10 ലക്ഷം മണിക്കൂറോളം ജോലി ചെയ്താണ് തുരങ്കങ്ങൾ നിർമിച്ചത്. റെക്കോർഡ് സമയത്തിൽ ഒരുങ്ങിയ ഈ തുരങ്കങ്ങളുടെ ആകെ നീളം 6.9 കിലോമീറ്ററാണ്.
വന്യജീവികൾക്കും ജനങ്ങൾക്കും ശല്യമാകാതെ നടത്തിയ നിർമ്മാണപ്രവർത്തനത്തിൽ നൂതന ഉപകരണങ്ങളാണ് ഉപയോഗിച്ചത്. ശബ്ദമലിനീകരണം കുറയ്ക്കാനും പാറ തുറന്നെടുക്കാൻ നടത്തിയ സ്ഫോടനങ്ങളുടെ ആഘാതം കുറയ്ക്കാനും അത്യാധുനിക ഉപകരണങ്ങളാണ് ഉപയോഗിച്ചത്. നിർമാണം പൂർത്തിയായെങ്കിലും, ജല-വൈദ്യുത ലൈനുകളും മറ്റ് അനുബന്ധ ജോലികളും പൂർത്തിയാക്കിയ ശേഷമാവും തുരങ്കങ്ങൾ ദേശീയ റെയിലുമായി ബന്ധിപ്പിക്കുക. നിർദിഷ്ടസമയത്തിനും രണ്ട് മാസം മുൻപ് തന്നെ നിർമാണം പൂർത്തിയായെങ്കിലും, ഇന്നലെയാണ് അധികൃതരുടെ ഔദ്യോഗിക സ്ഥിരീകരണം ഉണ്ടായത്. പുതിയ റെയിലിലൂടെ വിവിധ എമിറേറ്റുകളിലെ പ്രധാനകേന്ദ്രങ്ങളെ പരസ്പരം ബന്ധിപ്പിക്കാൻ കഴിയുമെന്നതിനാൽ യുഎഇക്ക് ആഗോളതലത്തിൽ കൂടുതൽ മുന്നേറാൻ ഇത്തിഹാദ് റെയിൽ സഹായകമാകുമെന്നാണ് വിലയിരുത്തൽ.
